男人的Fantasy (六十五) 星座
圖片來源：互聯網
以前我唔信星座，因為我覺得唔型。男人要信都係信風水，星座係留俾女人信。
所以我每次行過廟街，對於一眾星座小王子或者公主嘅檔口，我多數不屑一顧，係睇都睇風水檔口，睇吓會唔會俾我遇到風水師傅捉住路人大叫：｢你額有朝天骨！｣嘅情景。
直到我第一個女朋友，分手時同我講：｢我哋都係處女座，其實永遠都唔會知大家諗咩，分手啦。｣
我當時心諗，妳係咪玩嘢？要分手就分手啦，處咩女咩星咩座呀？
好快我就唔記得咗呢件事，然後好快我又揾到我第二個女朋友。
好不幸，半年後我哋分手時，佢同樣都係講咗一句有關星座嘅說話：｢處女座真係好似啞咁。｣
我好鐘意第二任嘅女朋友，佢講嘅一句說話遠遠比第一任嘅重要。我開始揾有關星座嘅書嚟睇，最後我先知道，原來處女座喺愛情世界入面就好似啞嘅一樣，唔擅於表達自己情感。
我開始睇得更多，開始知道金牛係固執﹑摩蠍係大事細心小事糊塗﹑天蠍係咸濕之類等等 ….
我開始收集同類型嘅朋友研究，最後我發覺原來星座講嘅嘢有好多都好準，我慢慢將呢一樣我以前唔留心嘅玩意，睇得愈來愈重。
喺呢個過程入面，我同好多人都交流唔少心得。星座有一段時間甚至係我擇偶嘅考慮因素。
我就好似揾到一件有把握嘅事一樣，佢可以幫我行少好多冤枉路，可以好快咁幫我揾到一條最適合我嘅路。
就好似一個宗教﹑一個信仰咁。
最後我千挑萬算下，揾到一個我認為同自己星座係最夾嘅女朋友。
但一年後，佢出軌，離開咗我。
當時嘅我，用崩潰都未能夠形容。我唔單止冇咗愛情，仲好似冇咗一種信仰。
背棄我嘅唔止係愛情，仲有星座。但好快我就諗通，其實人生在世，所有預測都只係輔助我哋上課嘅工具。人最重要嘅，都係要靠自己。
一個人，同一段路一個性格。但開心快活一個樣，每日愁眉不展又係一個樣，我哋又點可以單為一個星座而去肯定我哋嘅路點行？
從此，我掌握自己所有事，聽我認為有用嘅說話。
做男人，咁先最型。
薛可正Facebook Page
http://www.facebook.com/sithoching