男人的Fantasy(六十六)整容
圖片來源：互聯網
整容雖然喺呢個世界愈來愈普遍，但由於人總係喜歡企喺道德高地，所以整容呢一件事，仲係好似吸毒一樣，寧俾人知而唔好俾人肯定答案。
但偏偏呢個世界個個都只係鐘意以貌取人，無論喺街上嘅一面之緣，定係落到夜店嘅目標搜索，每個人都只會用外表做第一選擇。
所以你永遠都只會聽到：「嘩呢條女對腳好長，好索呀。」
而唔會聽到：「嘩，呢條女隻手好粗，好似做家務好叻呀。」
女為悅己者容，去到呢個世代已經推到極致。有好多女人基本上當自己塊面已經係一塊畫板，只要洗得甩嘅，佢都夠膽畫上去；亦都因為「洗得甩」呢三個字，令到佢哋搵到一個喘息嘅空間。
好多人覺得化妝係藝術，整容就係唔應該甚至係墮落，但呢個觀念只係用來呃自己。如果你手上面每日都有一個紋身，咁呢個係真正紋身定係印水紙，其實意義已經唔大。
我有時會有迷思，如果一個女人每一日都化妝化到自己面目全非咁，咁其實佢係整容定係化妝，又有咩分別？
人有時就係放唔低好多羊群嘅觀念，明明好多事自己已經有新睇法，但偏偏自己注意力仲係放於大眾嘅目光上面。呢一樣心態韓國人比我哋行得前好多步，既然整容公司已經開到便利店一樣，所以佢哋去整容嘅心態亦都調節到同我哋行入便利店買罐可樂咁簡單，做人又何必為難自己？
點解我會諗到咁大堆字？因為我見到我朋友阿強，冇錯又係阿強呀。佢上星期同分手年半嘅女朋友復合，但點解會關我事？
佢女朋友叫Mary，典型屋邨長大其貌不揚小慳妹。外表頂多五十分，但以前對阿強可以話係無微不至。Mary因為知道自己唔靚，所以一直都好自卑。鐘意睇韓劇嘅Mary，突然有一日同阿強講，佢要整容佢想靚啲。阿強聽到佢咁講，個人好似癲咗咁鬧佢，點解好地地要喺塊面切兩刀？
阿強同我哋一班朋友訴苦，其實我哋都覺得多餘，因為我哋都知道佢咁多年都唔係太鐘意Mary，明明就係外遇萬千燦爛像繁星，留喺Mary身邊係因為次次啲外遇玩完都飛咗佢，其實阿強不知幾想同Mary分手。
最後阿強阻止咗Mary整容，但三個星期後，阿強亦都同Mary分咗手，因為佢終於搵到一個玩完都唔走嘅外遇。
一年半之後，再次單身嘅阿強見返Mary，但已經唔認得佢。冇錯mary最後去咗整容，仲用盡自己嘅積蓄整到半個范冰冰加半個佟麗婭咁。但就算佢整到點，佢始終係對阿強念念不忘。
最後佢哋復合，原因係咩我唔知。阿強當Mary仲係Mary定係外遇我都唔知，反正我就係知道，做人永遠都係靈活地忠於自己係比較好。所有外人嘅說話同目光，根本就係小菜一碟。
薛可正Facebook Page
http://www.facebook.com/sithoching