男人的Fantasy(六十七) 父子
圖片來源：互聯網
男人係一樣好奇怪嘅動物，儘量好多男人天生都好豪邁同鍾意講嘢，但一個男人同另一個男人交集時，又唔一定係一加一等如二。
兩個男人會因為唔同嘅關係，而產生唔同嘅效果。
如果係一對同學，佢哋可能無所不談；
如果係一對同事，佢哋可能會惺惺相惜；
如果係一對父子，佢哋可能………
係咩可能都會發生。
我成日都想為「父子」呢個關係去做一個研究，到底有冇一個既定方式，可以肯定一對父子可以好似朋友關係咁健康成長。我自己同爸爸感情比較薄，所以我好喜歡觀察我身邊朋友同佢哋爸爸嘅關係。
最後我發現「父子」呢個關係，其實一啲都唔容易經營。一個成年人帶一個生命去到呢個世界，基於愛同責任，佢會對呢個佢認為係脆弱到不得了嘅新生命畫一個範圍，確保小生命可以健康快樂成長。
最後小生命慢慢長大，發覺呢個既有嘅圈圈可能唔適合自己。佢開始掙扎，想搵屬於自己嘅世界，但成年人眼中呢一種叫反叛。
成年人同已經成長嘅新生命兩者價值觀開始對峙，最後大家都唔認同大家。輕微嘅可能會有一兩次爭辯，嚴重嘅可能會影響到大家關係。
好多「父子」就係喺呢一種過程中，慢慢遺失咗對彼此嘅感覺。
所以我一直對可以視子女為朋友嘅父親致以最崇高敬意，因為佢不但將一個新生命養大、教好。甚至為咗令到新生命可以有自己嘅天地，而去割捨一啲，唔係每個人都可以放低嘅己身價值觀。
呢一種係愛嘅表現，亦都係真真正正捨己及人嘅好例子。
每次諗到呢度，我都會好自然咁諗到自己小朋友。唔知道到咗佢去到想掙扎嘅年紀時，我可唔可以達到呢種愛嘅境界？
我同佢將來嘅關係，又會唔會係我心目中想要嘅一種呢？
薛可正Facebook Page
http://www.facebook.com/sithoching