男人的Fantasy (七十)不交帶女朋友
圖片來源：互聯網
阿強有一日向我呻，佢女朋友阿大，總係好似一隻無尾飛陀咁。
「正，你知我份人長氣，有時佢放工去玩，離開公司時想佢俾個電話我之嘛，佢都總係唔記得。」
阿強嘅憂慮我係明白，因為阿大嘅外表的確係高檔次，落一轉老蘭俾人抄十次八次牌真係正常到不得了嘅事。阿強個人又肥，頭髮又開始無乜，有危險意識係正常。
「咁佢唔搵你，係真係同其他人一齊唔想你搵，定真係唔記得咗先？」
「咁佢又真係唔記得咗啫，佢個人好大頭蝦，又工作狂。公司啲事成日都堆到成個電話都係，我哋有時食飯佢都會掛住做嘢，飯都唔記得食。」
「嘩，咁樣好唔尊重你喎，食飯都掛住做嘢。」
「喇阿正我又唔准你咁講，我就係鍾意佢個人有責任感，應承人嘅事一定會做，雖然有時會遲咗，但佢就係上心到當正自己嘅事咁。
呢種心態嘅女仔，宜家好難搵架喇。」
「咁都係吖，去玩唔同男朋友講聲，大佬擔心㗎嘛，又驚妳俾人溝咗去，又怕妳見到醉酒佬。」
「係呀……有時唔係想管佢，只係兩個人見唔到就心掛掛，好想佢知我掛住佢。」
我望住阿強含春咁嘅樣，好似想喊咁，我立即阻止佢繼續：
「強哥，你女朋友唔喺度，深情心情收埋先。」
「好掛住佢呀。」
「大佬呀佢去咗中環玩咋，唔係去咗中東呀，係咪要咁嘔心呀？同埋咁冇交帶俾著我就一早飛咗佢。」
「飛咗佢？我推你落街都唔會飛佢呀。」
望住阿強反應，我覺得好好笑：
「強哥，其實你一早都知阿大性格係咁，佢嘅好同唔好你一早已經接受晒，又使咩搵我呻呢？」
阿強飲一啖啤酒，好感慨咁講：
「其實我都知自己有小小煩，但男人老狗真係好難次次講出口想佢理我，講得多自己都厭啦。
只不過有時真係好掛住佢，所以咪搵啲傻仔出嚟陪我飲酒分散吓注意力囉。上個星期係阿明，今個星期到你唔好彩。」
「你個賤人。」
「好喇，阿大WhatsApp咗我，我又充滿力量要去接佢喇，你早抖啦。」
薛可正Facebook Page
http://www.facebook.com/sithoching