2016/03/24

男人的Fantasy(七十一)自瀆王子

20160324_蔣薇_MenClub
 
圖片來源:互聯網
 
男人出嚟做事,一日遇到好多種人,所以帶眼識人呢個警覺性我經常都保持住。並唔係話驚自己次次都遇到壞人,只不過望真一個人先做朋友,點都好過大家做咗老死先發現佢令人難以接受嘅一面。
 
就以「自瀆王子」呢個系列做示範,大家好快就會明我講咩。
 
「自瀆王子」,泛指嗰類永遠將自己包裝得與眾不同高人一等,但實際上全世界都知道佢咩料到,但又因為修養問題而唔將佢哋篤爆嘅人。
 
我曾經有一個朋友,每次去夜場都會渣佢架唔算好貴但都悅目嘅舊款波子出嚟。友儕之間傾偈時佢都會將自己部愛驅掛喺口邊甚至踐踏他人,令到好多朋友都甚為無癮。不過老天有眼,有一次意外地俾大家知道原來佢只係一個司機,波子當然係屬於老闆,蒙在鼓裡嘅佢依然照舊show off,但朋友間已經將佢撥入「自瀆王子」一列,喺朋友關係層面上永遠unlike,玩完。
 
又有一個朋友,做管理公司老闆,白手興家,甚為自豪。Facebook見佢日日唔係影住自己幢幾百萬貨仔新界樓,就係幾皮嘢嘅名錶。本來自己買就自己影呢樣就真係冇咩問題,弊就弊在呢位朋友平時出親嚟食飯都有舖拖數癮。一大班朋友去唱K佢就永遠走先,埋單人頭位位五百嘅錢就一定要其中一個朋友幫佢硬食。走得兩走食我兩食,一年落嚟佢爭落嘅娛樂費,差唔多夠佢供自己幢新界樓一期錢咁滯。
 
不過佢好嘢,次次還幾百,還一次又爭多兩次咁,搏人地唔出聲,最後又開開心心返去影自己嘅錶同樓,繼續上網呃LIKE。
 
仲有好多扮有錢人扮老闆扮醫生律師去搵著數嘅我就唔講,我自己都曾經講過,男人三十歲後其實真係好難搵真心朋友,如果大家真係覺得搵到,記得要再睇真小小佢係唔係「自瀆王子」先好同佢FRIEND呀。
 
薛可正Facebook Page
http://www.facebook.com/sithoching
 

COMMENT