男人的Fantasy(七十二)靈魂相認（上）
圖片來源：互聯網
我叫阿祺，今年三十四歲，我想講一個兩個鐘頭前發生嘅故事俾大家知。
個故事應該由我喺中環畢打街度講起，我自己一個人向公司方向行緊時，突然間，見到十呎距離前有一個好熟悉嘅女仔背影。
「小茜。」我唔知邊度嚟嘅勇氣，向住個背影就大叫咗出嚟。個女仔轉身，呢一刻我幾乎喺人來人往嘅中環入面喊咗出嚟。
我冇認錯人，佢叫小茜，我三年前拍拖三個月嘅女朋友。不過同時喺三年前拍拖後三個月嘅一日，佢跟住父母去咗澳洲。之後，我再冇見過佢。
佢家族未至顯赫，但尚算有個錢。而三年前嘅我，只係一個更生人士，冇錯，我曾經坐過監。我哋喺一個朋友聚會入面相識，我哋好投契，投契嘅意思唔係我哋會鍾意同一樣喜好，而係對方鐘意嘅人事，我哋都會好自然咁受落。
我由一個一年睇唔到兩套戲嘅悶人，變成三個月睇十三套戲嘅電影迷；而小茜亦由一個十指不沾陽春水嘅小花，變成一個識煮飯嘅女人。我坐監時曾經被編去做廚房，最後我將坐監時學到嘅烹飪功夫，教到一個千金小姐手上，真係奇妙。
我哋好鍾意一齊去唱卡拉OK，小茜唱歌好好聽，我仲好記得佢第一次望住我唱嘅一首歌，係謝安琪嘅「載我走」
還好有你在 讓我喘息悠閒下來
就算身處洪流中 安然能無礙
喺小茜面前，我從來都冇自卑。佢脾氣唔好，好多時小小事就會想發脾氣，但喺我面前，佢仲會記得我教佢想發脾氣時，要深呼吸一、二、三…個世界好快就會變返好靚，唔會想發脾氣。
呢一招都係我坐監時一個老前輩教我，佢話入面咁多惡人，你發得幾多次脾氣？我亦同小茜講，呢個世界咁多蠢人，你又發得佢哋幾多次脾氣？
我哋去過一次長洲，夜晚我攬住佢，望住整個海景，我覺得個世界係我嘅，因為我攬住小茜，感覺就係咁簡單。我自細都覺得自己欠缺好多，單親家庭、冇人照顧、誤入歧途…但都唔重要，我覺得可以同小茜一齊，以前唔見咗嘅一切已經變得冇所謂。
當年我三十一歲，我唔係冇拍過拖，亦見過好多女人，蜜月期嘅事我好清楚，但我更加清楚我同小茜嘅故事係點樣寫出嚟。係稱身，你可以隨便搵到個人拍拖，但你唔可能隨手搵到一個人令你可以放低所有武器，暢所欲言而有信心對方會毫不介意。
但世界冇童話，小茜最後將我同佢嘅事講俾佢屋企人知，佢屋企人知道我坐過監後，反應係前所未有咁大。佢哋收起小茜所有電話，唔俾佢出街，唔俾佢見我。
足足一個星期，小茜好辛苦先喺佢一個朋友口中，將呢件事話俾我知。
小茜媽咪曾經遇過一次劫案，一個啱啱出監嘅男人因為走投無路，將小茜媽咪身上所有錢搶走，所以聽到我身世之後，小茜全屋企人都非常反對我呢個人嘅出現。我會影響小茜一生，而且係壞影響…
小茜係一個孝順嘅女仔，佢冇辦法處理佢媽咪每一日嘅軟硬兼施。最後我知道佢會跟屋企人去澳洲，我唔覺得自己有咁大影響力，可以將佢哋一家人嚇走，但已經冇所謂，最後小茜的確係走咗。
走之前我寫咗一封信請朋友交俾佢，我讀書唔多，而根本喺呢件事上面我已經冇任何說話可以表達。係時間定係天意，好多人事根本返唔到轉頭，我永遠都係一個坐過監嘅人，一個佢屋企人最討厭嘅身份。
信入面我只係寫咗三個字：我愛妳。
而小茜亦都寫咗一封信俾我，信入面都係有三個字，但呢三個字係：一二三…
小茜總係比我諗得更多，佢走咗之後，每次我諗起佢，我都會默默咁唸呢六個字…
一二三，我愛妳。（待續）
薛可正Facebook Page
http://www.facebook.com/sithoching