2016/04/14

男人的Fantasy (七十三)細心事件簿

2016_04_14_薛可正MenClub Column_細心

圖片來源:互聯網
 

拍咗幾百年拖,追過唔少類型嘅女人,我以為自己身經百戰,任何一個女人我都瞭如指掌,勢估唔到今晚我會俾現任女朋友小喬殺我一個措手不及。
 
小喬:「我要分手。」
 
「咩話?點解呀?」
 
「因為我覺得你唔夠細心,唔細心嘅男人,對一個女人好極都有限。」
 
咩話?我唔細心?次次落雨我都會叫妳小心唔好冷親,妳次次冷親之後我都會叫妳休息多啲我先收線去打機,次次妳要睇醫生我都會陪妳喎…如果唔駛返工嘅話。
 
「細心唔係咁㗎。」
 
吓?咁細心係點㗎?基本法或者聖經入面有冇記載?我可以去邊度報讀一啲類似「完全細心課程」嘅課程呀?
 
小喬呢個分手嘅原因,就好似當頭棒喝咁將我打醒。最後我忍唔住,打返俾我幾位前度女朋友。
 
阿Mary話
 
「挑,你梗係唔細心啦,記唔記得第一年聖誕我同你去睇燈飾。我突然間M到,打晒暗號想你幫我去買M巾,最後你好似碌木咁,要我自己夾住對腳去買。」
 
吓,我點識買M巾呀?嗰次我哋拍拖三個月都唔夠,我邊度敢主動幫妳買M巾呀?唔通我又叫妳幫我買避孕套呀?
 
抵我飛妳㗎當年,next!
 
阿Linda又話:
 
「你同我拍拖三年,過時過節都唔識打電話俾我媽咪問候吓,你就梗係唔細心啦。」
 
喂,我都冇妳老母電話,係咪分咗手就亂咁搵嘢砌我生豬肉呀?下個!!
 
阿靜最好脾氣,阿靜講:
 
「細心?如果我想喺你嗰身度搵細心,我就唔會同你一齊兩年啦傻佬。不過你有好多優點,唔使一定要有細心㗎嘛。」
 
但我今次死亡原因係唔夠細心嘛,妳話我知啦阿靜。
 
「我宜家男朋友次次都會批埋蘋果皮俾我食,你諗下自己有冇試過?」
 
蘋果又真係好似冇喎,但妳食蕉我有幫你剥皮呀,蕉都係生果丫大佬。
 
我坐喺條街上面,一路咁諗,我係唔夠細心,我就算真係唔夠細心,呢樣真係一條死罪?
 
三日後,我終於知道真相,有朋友喺街見到小喬拖住一個男仔。個男仔比我後生,比我靚仔,但睇唔到有冇比我細心。
 
所有嘅事都唔重要,但我起碼明白一件事。如果唔係小喬隨便講咗一個原因出嚟,我唔會搵返以前嘅女朋友去追問。如果我唔追問,我根本唔知道,以前嘅我根本就唔係一個細心嘅人。
 
冇咗一段感情唔係大事,認清到自己先係進步。
 
薛可正Facebook Page
http://www.facebook.com/sithoching
 

COMMENT