2016/04/21

男人的Fantasy (七十四)樽頸位 

2016_04_21_bottleneck
 
圖片來源:互聯網
 
成日聽到人講,呢個世界男女唔平等。但其實我覺得係平等,視乎我哋自己用咩角度去睇。男主外女主內,其實就已經好平等,男人外出工作受氣,女人一樣要為打理好一頭家而辛苦,其實所有好同唔好都唔可以量度,所以唔需要太過比較。
 
但係我覺得男人嘅人生都需要比較主動,主動去搵自己事業,因為身後會有人等住佢去帶領;女人就可能會被動小小,因為眼見好多女人嫁到個好老公,其實生活已經小好多煩惱。
 
所以不斷要衝前嘅男人,一般都好容易遇上樽頸位。
 
無論幾多歲、身份高低、得到嘅嘢有幾多,我發現男人行到某一個位都係會迷失方向。遇上呢個情況,無論平時幾有自信嘅人都會出現信心崩塌,幾有計劃嘅人都會覺得自己前路茫茫,得到嘅人與事都認為唔實在,隨時都會失去。
 
有人話呢啲叫情緒病,如果情況於接近大些年紀嘅階段出現,更加會話呢啲叫中年危機,但我個人就樂觀小小,我會覺得呢啲叫樽頸位。
 
人都係有劣根性,比著你有錢到李嘉誠咁,身邊件件都好似林志玲一樣,你都會習慣。習慣係一樣好恐怖嘅事,恐怖在一旦習慣咗某一樣人與事,你會變得有佢就冇咩感覺,冇咗就周身唔安樂。
 
但一個男人去到一個年紀,身邊擁有嘅嘢慢慢累積,而自己本身能力亦慢慢封頂。一旦出現樽頸位時,就會出現一個恐慌情況,因為呢個男人知道自己突破唔到現狀。
 
或者突破唔到只係悲觀諗法,樂觀小小可以叫難於突破或者係聽天由命。呢個時候絕對係最考驗男人嘅本身能力,就好似一個已經跑到一半馬拉松嘅選手仆咗街,仲有冇能力靠自己再起過身,望住前面一個又一個風景再迎頭追上。
 
整個過程好孤獨,你必須要接受呢個世界有某幾種苦樂,係冇辦法冇途徑同任何人分享。因為呢類感覺,來襲嘅時候多數都係得你自己一個人去面對。
 
睇到呢度,我覺得好多男人已經嘆緊氣。但其實唔緊要,我認為呢個世界上所有事都係唔緊要。撇除自己附加嘅壓力,呢個世界好多時都可以退一步。每個人都會有高山低谷,最重要係我哋都接受到同享受到,千萬唔好做到高時唔心安但低時又唔甘心,人生每一個起落都係經歷。
 
如果唔係咁,人生邊度好玩?識玩,樽頸位其實都幾好玩。
 
薛可正Facebook Page
http://www.facebook.com/sithoching
 

COMMENT