2016/04/29

男人的Fantasy (七十五)附近的人 

2016_04_29_薛可正MenClub Column_附近的人.docx
 
圖片來源:互聯網
 
阿峰三個鐘頭前睇住女朋友喺中環拖住第二條仔,諗住打個電話質問對方,最後變成女方一輪嘅語言凌辱。男同女之間嘅故事,好多時都離唔開「男人唔可以窮」呢六個字。
 
返到屋企之後,阿峰打開手機,傷心到一個點嘅佢,已經唔知道做乜嘢可以令自己減輕痛楚。之後三日,佢喺屋企食完又瞓、瞓完又食。去到第四日,佢打開電話入面嘅微訊同朋友傾偈時,收到「附近的人」嘅一個訊息。
 
阿峰想搵返存在嘅感覺,盡快搵個人代替前度,係一個唔錯嘅諗法。
 
對方叫小晴,從微訊入面張個人照嚟睇,應該係一個年青性感而奔放嘅女仔。阿峰毫不猶豫咁同對方連接上,因為呢幾日阿峰已經諗清楚,唔好為一棵枯樹而放棄一個森林。
 
正所謂姣婆遇上脂粉客,喺呢類為咗約炮而誕生嘅工具入面,阿峰同小晴好快就熟稔咗。小晴二十歲,三年前由家人申請佢由江西嚟到香港生活。小晴書就讀唔成,每日就係拎住個電話識朋友。
 
佢識朋友嘅方法識得好徹底,每一次都係識到上對方張床。小晴唔介意,性對佢嚟講只不過係食一餐飯咁簡單,有時佢請人食,有時又會係對方請佢食。
 
小晴遇上阿峰,佢哋好快就打得火熱,每日大家都係匿喺阿峰用五千八蚊租返嚟嘅二百八十呎唐樓入面食瞓屙。阿峰喺小晴身上見到憧憬,以為佢好快就可以代替前度嘅位置,小晴對佢好好,好到令阿峰覺得自己諗嘅所有事都會變成事實。
 
但一年後,就好似「十二夜」電影入面經歷完嗰十二個晚上之後,佢哋開始向對方埋怨,至於埋怨邊一樣,其實每個戀愛過嘅人都好清楚,當狀態出現時,當中嘅細節已經唔重要。
 
最重要,佢哋已經開始覺得對方討厭。
 
小晴的確已經代替咗阿峰前度,佢已經充斥阿峰嘅生活。但到底係阿峰認為佢已經代替咗自己前度,定係小晴真係可以代替到阿峰前度,呢個問題根本冇人知。有時阿峰會諗,到底點解自己要小晴代替自己前度?呢一種遮蔽式愛情除咗可以令人重拾愛情生趣之外,仲有乜嘢咁好?
 
當小晴光環慢慢退落,唔可以做到遮蔽效果時,阿峰又會跌入痛苦之中。三個月後,小晴同阿峰終於分手,原因亦都係小晴搵到一個更適合自己嘅男人。
 
但到底係生活適合,定係新鮮感上面適合?小晴自己都唔知,反正佢已經唔可以再同阿峰一齊。
 
已經愛情麻痺嘅阿峰又一次返到死靜嘅屋企,今次佢再拎電話出嚟,望住已經將自己拉入黑名單嘅阿晴帳號,阿峰覺得好難過。佢想再試一次,再用一個陌生人去遮蔽自己嘅傷痛,佢打開電話,望住「附近的人」四個字,佢突然停低自己嘅動作。
 
三分鐘後,佢收起電話,選擇瞓一個好覺就算。
 
我哋嘅愛情,有時冇遠觀冇耐性,好多時都會將就自己感覺,一直都只係搵一個「附近的人」。
 
薛可正Facebook Page
http://www.facebook.com/sithoching
 

COMMENT