男人的Fantasy (七十六)帶住矛盾去睇波
圖片來源：互聯網
「老婆，我出去睇波呀。」
每次有重要足球比賽，我都會出街睇。我同老婆結婚都有十幾年，各有各嘅工作範圍。三個仔出世之後，基本上我哋已經好少傾屬於我哋兩個人嘅事。
我叫祥仔，你哋可以叫我Johnny，我係一個會計師。
其實我好怕嘈，以前每次睇波，我都會選擇喺屋企睇。嗰時老婆仲未有咁忙，我哋話題仲未有咁小，佢每次都會同我坐埋一齊睇波。直到後來，佢陪我睇波嘅時間，由全到半場、再由45分鐘，然後15分鐘…
最後，變成「我好多嘢未做，你睇完好早啲瞓。」
我明白，湊三個小朋友嘅工作量，比起我幫三間公司年尾埋數仲要忙。我理解，但唔代表我唔會覺得失落。有時人生就係咁矛盾，兩個人拖住手想由A目標一齊走去B目標。走到B目標之後，我哋又會懷念喺A目標時嘅純粹。
後來，我選擇自己一個人出街睇波。我怕嘈所以從來唔叫朋友一齊睇，亦都唔會落酒吧睇。我試過自己一個人去卡拉ok開一間房睇，但一路聽住「好心好報」同「浮誇」睇波，從來都唔係一件值得享受嘅事。
最後，我選擇去夜總會一個人睇波。
夜總會同卡拉OK最大嘅分別，就係收費。三千蚊包底租一個房換取寧靜，如果我只係食佢一個果盤同飲一支酒﹝我酒量唔好﹞，我覺得侮辱咗我自己會計師嘅身份，所以我好多時都會叫一個公關小姐，一千蚊換佢三個鐘，坐喺我身邊唔使講嘢，安安靜靜陪我睇波，咁就已經好好。
今晚，Cat媽又走入嚟，問我要咩女仔：
「Johnny哥，今晚有波睇又見到你喇，點呀想搵邊個呀？叫返上次嗰個Ally俾你好冇呀？」
「上次話自己叫妹頭嗰個？佢話陪我睇波，但咩叫越位都唔知，足足煩咗我三個鐘要我解釋俾佢聽喎。」
「你要識睇波咋下，得，等我一陣。」
十分鐘後，一個叫寧寧嘅女仔入咗嚟。佢個樣生得幾靚，只不過黑眼圈有啲大，有小小似熊貓。
一坐低，佢就好熟手咁問我：
「Cat媽話你鐘意睇波，今晚邊隊對邊隊呀？」
「荷蘭對意大利。」
「嗯，去個廁所先。」
寧寧去廁所期間，我喺外圍Sam度買咗五千蚊荷蘭嬴。我覺得自己係一個病態賭徒，有時覺得咁樣先可以將睇波呢件事完整化。
寧寧返嚟後，我哋就開始睇波。寧寧睇波好安靜，佢坐喺我隔離，無咩點講嘢，但從佢間唔中講嘅幾句評語，你會知道佢真係識睇波。
「封近柱啦頂!!!」
「俾條邊佢去丫嘛，仲俾佢走入大位射。」
「喂，唔好亂標呀。」
我開始對呢個女仔改觀，因為我覺得自己搵到一隻好好嘅睇波腳。荷蘭完場前一次突擊，由洛賓射入一比零。
「收錢!!」我大叫，但寧寧塊面就黑過墨斗
「喂，笑吓啦，我嬴錢呀請妳食宵夜啦。」
「食咩都補唔返啦，我買咗皮半意大利呀。」
「皮半？」我驚訝，喺呢個空間入面我假假地都算妳老闆，我買五千蚊妳竟然買多一萬落我對家？有冇理過我感受先？
「妳搵幾多錢呀女？俾妳搏到盡咪一晚幾千，辛辛苦苦搵幾晚嘅錢，一舖冇哂為咩？」
「痴線我返嚟猜下枚飲下酒架咋，最多咪兩千蚊晚。」
「咁咪係囉，兩個鐘輸咗七日人工，咁樣好咩？」
「睇波唔賭錢，件事邊完整呀？錢無咗咪再搵囉。」
寧寧走咗之後，我一路返屋企一路諗。我哋一世人流流長，總係唔知自己想要咩。就好似我可以用錢買空間、買娛樂…甚至可以買其他人時間，但我到最後返屋企時，根本唔知自己帶走咗乜嘢。
我甚至以為買咗人嘅時間之後，喺短短三個鐘頭內可以買到一份身份上嘅肯定。但到頭尾我先知，我呢個老闆賭場波嘅出手，只係我呢個暫時員工嘅三份之一。我以為錢可以控制到嘅感覺，其實從來都控制唔到。
人生，本來就係咁多矛盾。
麻醉，其實只不過係麻木地買醉，始終都有醒嘅一日。
薛可正Facebook Page
http://www.facebook.com/sithoching