男人的Fantasy (七十七) 住市區，可以方便返屋企鬧交
圖片來源：互聯網
阿欣同阿俊係一對就快結婚嘅情侶，將來愛巢嘅地點，係佢哋最近煩惱嘅事。
我介紹吓先，老婆阿欣係一個正宗馳名港女，乜都要貴，又乜都要面。
阿俊係個普通上班族，公屋仔出身，衣食住行夠用就得，人生最唔鍾意就係壓力。
佢哋兩個人加埋嘅人工大約係四萬三千蚊左右，喺今時今日呢個香港，爭小小就算係貧窮線以下，絕對唔可以同嗰啲個個月拎綜援，隔三個月就去一次旅行嘅富貴人家相比。
不過阿欣覺得，窮還窮，面子都係好重要。女人一生人入面，嫁個好老公可以話係重點培訓嘅項目。唔買幢貴樓，邊有人知我嫁得好？
最後阿欣揀咗一幢市區樓，樓價幾百萬，月供一萬九千蚊。
阿俊唔理解呢個諗法，佢揀咗一間新界樓，兩百幾萬，月供一萬…唔使。
不過佢呢個諗法好快俾阿欣否決咗，原因係「住市區，方便返工」。最後阿俊當然不敵，佢哋好快而又好吃力咁，就買咗間市區樓。
相比起新界嗰間，市區樓的確係方便好多，兩口子返工時間，足足慳咗六成。但除咗咁之外，阿俊搵唔到任何快樂。
佢已經大半年冇買過模型同限量版波鞋，對上嗰次同阿欣嘈到爭小小離婚，係阿俊先斬後奏咁買咗一部PS4。
四萬幾蚊嘅人工，供樓已經佔四成，管理費飯錢交通費電話費上網費水電媒加加埋埋，再扣埋四位父母嘅家用，兩口子每個人剩返嘅錢，係一個令人唔開胃嘅三位數字。
「點解一定要買間咁貴嘅屋？」有一次，阿俊終於忍唔住講
「我都想我哋生活好啲之嘛。」阿欣大聲反駁
「但我宜家生活都冇埋呀，次次有朋友結婚俾張帖我，我第一時間就係打開睇下擺酒店定酒樓，我寧願俾真嘅炸彈炸一鑊，起碼即死唔使下個月又俾人炸多次。」
「你怪我呀？」
「我知呀，我有份話買嘛!!!」
阿俊講完，打開門就走出間屋。
兩個人喺埋一齊，決定要住一間屋，行同一條路。好多時都以為準備好所有道具，幸福就會嚟到。
佢哋完全冇諗清楚，兩個人嘅目標，係一齊住，定係一齊生活。
薛可正Facebook Page
http://www.facebook.com/sithoching