男人的Fantasy (七十八) 夜場瑜亮
圖片來源：互聯網
「早知唔屙嗰篤尿啦，頂…」
我一條友拎住支啤酒，一路由安蘭街行到去鏞記。時間已經係朝早嘅五點三十二分，天已經開始光。我眼前嘅，就只有幾位掃地阿姐，同埋一班飲到周街瞓嘅死鬼佬…
「我唔應該去屙尿…我唔應該為咗去七仔買避孕套而扮屙尿。」
我叫博文，蘭桂坊邊個唔識我「中環宋仲基」，平時我就係一個專業嘅白領人士，一到夜晚，我就係一個專門喺夜場尋幽探秘嘅「歡場狙擊手」。
時間去返五個鐘前，老蘭一間新場入面，我識咗一個做地勤嘅空姐，佢叫Mary。Mary人靚聲甜唔在講，性格主動嗰吓夠精乖丫嘛。我喺公海一手就扯咗佢返嚟，開頭熱身唔使講，大家都係講吓工作咁，我講下打樁時佢又講下淫賤機師嘅真實個案，傾得不知幾開心。
飲飲吓，我見到我老死Ronald。Ronald同我一樣，又係一個狙擊手，不過我同佢感情一向好好，永遠都唔會睇中同一個目標。Ronald坐低，同Mary互相介紹兩句之後，我就拉埋Ronald一邊靜靜雞咁講。
「有冇袋喺身？」
「有，一個。」
「借住嚟先啦。」
「喂博文哥，借完俾你我今晚用保鮮紙呀？」
「我手頭上就有大Project要跟喇，最多一陣買返俾你啦。」
「嘩你睇小我呀？呢個場啲廁所出咗名係gethering聖地，一陣我借咗俾你，又咁啱俾我撈到好嘢，咁我點算呀？出嚟玩，寧願借錢俾人都唔可以借袋，好唔老黎你唔係唔知呀？」
「我頂……咁你幫我睇住先，我落一落七仔。」
我走返去Mary身邊，喺佢耳邊好細聲咁講咗一句：
「呢度啲廁所好多人，我落一落去小個便，等我。」
Marry含苞待放咁向我點點頭，跟住我就即時衝落樓下七仔。但係我唔記得咗，最近嘅七仔因為成幢大廈重建而收咗皮。最後我一行就係三條街，行到身水身汗先買到袋同真係順便屙到篤尿。
誰不知…
當我返到去時，風光已經不在。我見到枱面多咗一條法拉利嘅車匙，然後見到Ronald同Mary玩得不知幾開心。從身體接觸上嚟講，我幾肯定Ronald已經起咗我尾注，於是我走埋去，用一副怨咒咁嘅樣望住Ronald。
「玩得好開心喎。」我大叫。
「係呀，我一陣仲會去Ronald度睇DVD，原來佢屋企好多舊戲睇架。」舊戲？宜家科技昌明，一天都係飛機一街都係電腦，「屋企好多戲睇」呢個到底係咩值得新奇嘅事？如果唔係枱面條法拉利車匙，佢屋企就算有恐龍你都唔會去啦。
「差唔多喇，行啦。」Ronald冇望我，一手就拖走咗Mary。
「我走先去睇戲喇，拜拜。」
江湖規矩，女呢啲嘢同自助餐入面嘅食物一樣，你有本事嘅話，就算搶咗人枱面碟龍蝦，對方都唔可以找晦氣。今次係我自己大意，戰場上只有勝利者，永遠都唔會有友情呢樣嘢。
但我最嬲嘅係，Ronald本來只係一個月入兩萬，但喺蘭桂坊附近租咗一個萬二蚊單位方便食女嘅普通打工仔。條法拉利車匙，仲係我兩個星期前教佢喺淘寶度淘嘅道具嚟。
薛可正Facebook Page
http://www.facebook.com/sithoching