男人的Fantasy (七十九) 歲月沒有神偷
圖片來源：互聯網
離開國金嘅辦公室前，我特別將今日紅色嘅外套放低，換上一早準備好嘅白色外套。
我今年三十四歲，正出發去一個由細玩到大好朋友嘅葬禮。
佢叫Roy，細個同我住埋同一個邨，我哋係踢波時認識。我哋呢種八十後，中學初期都仲未有電腦玩，周山跑就係我同Roy嘅回憶。跟大人踢波、食冰條、入銀行涼冷氣、去沙灘游水…曾經有一段時間我哋係孖公仔，好朋友到一起身就會一電話俾對方，約定今日會去邊度玩
後來，好似好多人嘅感情一樣，因為讀書，亦因為新朋友，我哋慢慢少見大家。到有一日，
Roy同我講，佢全家要搬去香港仔，嗰一刻嘅心情，我同冇咗女朋友冇分別。
雖然有留低對方電話，初期我哋都有聯絡。但慢慢，因為大家身邊發生嘅事已經冇交接，我哋嘅話題已經慢慢減少。曾經嘅一段童年回憶，亦因為咁樣而慢慢退色。
其實呢類故事真係唔太罕見，我夠膽講每一個人都至少有一段友情係咁樣演變直到落幕。一樣本來好似瑰寶咁重要嘅事，唔知點解我哋會輕易咁放埋一邊，最後等佢無聲無息咁枯死。
係咪我哋都覺我一生人入面時間好多，就算錯過嘅事，好輕易就可以執得返；定係我哋以為已經過氣嘅事都唔需要保留，就算係感情都好，始終會有新嘅事物去取代得到？
我一直以為時間係一樣好厲害嘅事，佢可以沖淡，甚至係摧毀所有事。我慢慢長大，經歷過好多人間離合之後，就覺得呢個世界好多事都唔堅固，就算幾好嘅感情，只要時間一耐，統統都會變質。
但當我收到Roy因為病而離開咗呢個世界嘅電話之後，我先知道自己諗嘅都係錯。為咗一個好耐冇見，甚至有機會以後都唔會主動見嘅老朋友，我三晚失眠。我一路諗，原來到咗我呢個年紀，真係會有我認識嘅人，一聲不響就會以後都見唔到。
我以為已經冇咗嘅感情，其實只不過係我哋自己淡忘。呢段感情一直都留喺腦入面，只係我哋冇搵過佢出嚟。
但一切已經太遲，當你意識到好多事嘅真正意義時，可能就好似我同Roy之間咁，只係剩返葬禮嘅呢幾個小時。
祝好走，好朋友。
薛可正Facebook Page
http://www.facebook.com/sithoching