2016/06/03

男人的Fantasy (八十) 轉基

Young gay male couple in bed not talking after a argument
 
圖片來源:互聯網
 
男士們,你哋有冇試過,有幾秒時間懷疑自己係基?
 
流行嘅交友App實在係太多,多到我玩都玩唔晒。呢一晚,我悶悶地咁睇最新出嘅App,睇到有一個交友嘅App,令我有Download嘅衝動。
 
呢個係一個同性戀者嘅交友App。
 
我從來冇懷疑自己係基,亦唔抗拒我身邊嘅同性戀朋友,因為我認為佢哋只不過係擁有同我唔一樣嘅飲食習慣。我之所以搵呢個App嚟玩,完全係出自好奇心。
 
男人戀愛嘅世界,到底係點樣呢?
 
我Download完個App之後,就搵咗張阿強嘅相開咗個假戶口。阿強係邊個?阿強咪係我做健身教練嘅朋友囉。佢一身橫練嘅肌肉,周不時啲女都睇到鬼殺咁嘈。
 
設定好個戶口之後,好快就有唔同嘅男人撩我講嘢。我扮阿強與唔同人傾偈,一路傾我就一路笑,網絡真係得意,咁都可以有一班人嚟陪我癲。
 
正當我玩得高興之時,突然間我收到一個叫Tommy嘅男人訊息。唔睇都好地地,一睇之下竟然係呢位Tommy幫其他男人口交嘅相嚟。老實講,我係俾呢張突如其來嘅肉腸相嚇親,因為我真係好少睇呢類相。
 
Tommy見我收到張相之後,就問我叫咩名,住邊?做咩工?有冇伴侶又或者係點解要上呢個App。佢好有耐性咁一直問,而我係拎住個手機,一句都冇答過佢。
 
唔知點解我覺得佢嘅問題好得意,而我覺得更得意嘅係,我竟然對呢回事冇任何反感嘅感覺。天使魔鬼呢個時候出現,我問自己點解會有一個咁怪嘅感覺…呢啲明明係我由細到大都冇諗過嘅事,我覺得自己唔會覺得得意,甚至會覺得嘔心嘅事,去到呢一刻,會完全係兩個感覺嚟?
 
我腦入面一路問自己,對眼就一路睇住Tommy嘅問題。Tommy開始發自己嘅相俾我,有啲係有著衫,有啲係冇著衫。呢個時候我嘅感覺更大,我竟然有追看落去嘅感覺。
 
我開始打字,開始想同Tommy溝通…但我嘅內心好矛盾,覺得當我輸出咗自己啲回覆之後,某程度上就好似摧毀咗自己一啲防線咁。我好掙扎…我非常掙扎,正當我覺得自己忍唔住要同Tommy傾偈嘅時候…
 
我女朋友突然打電話俾我。
 
我好快咁接過個電話,發條式咁講咗幾句對答後就收咗線。收線後,我好快咁刪除咗個App,然後將部電話放低。
 
原來人腦入面有好多事,一直都唔係自己想像咁簡單。
 
薛可正Facebook Page
http://www.facebook.com/sithoching

COMMENT