2016/06/10

男人的Fantasy (八十一)麵包定愛情?

2016_06_10_薛可正MenClub Column
 
圖片來源:互聯網
 
阿兒準備同拍拖三年嘅男朋友阿凡分手,原因係阿凡唔上進冇將來。除此之外,有一個有車有樓嘅男人追緊阿兒。望唔到將來呢個課題實在太恐怖,所以阿兒決定就算接唔接受呢個有錢男人都好,佢都要同阿凡分開。為咗自己嘅未來,為咗自己嘅青春。
 
就喺決定分手前嘅一晚,阿兒好糾結。因為佢諗起,阿凡除咗又懶又唔返工呢啲缺點,其實佢係好錫阿兒。阿凡試過在大雨中等阿兒收工,最後佢等咗三個鐘。
 
等到阿兒收工嗰刻,阿凡唔單止冇發脾氣,仲送咗一幅畫俾阿兒。阿凡畫畫好叻,佢就係用嗰三個鐘頭,畫咗一幅畫。具體嚟講,阿凡個人嘅缺點就只有唔長進同冇錢,除此之外,佢係一個冇脾氣,又事事會為身邊人操心嘅好男人。
 
阿兒同阿凡一齊嗰時,就係欣賞阿凡對所有人嘅無私。佢會幫人做義工搬屋,佢會用自己時間去為其他人出力。阿凡追求係心靈快樂,阿兒清楚明白呢一點,只不過唔知幾時開始,阿兒認為呢一種叫唔上進。
 
係出嚟做嘢開始?定係阿兒開始追求生活開始?阿兒唔知道,佢只係慢慢由一個去藝穗會睇展覽嘅小女孩,過渡成一個去到中環只會望住名店嘅女人。阿兒冇做錯,因為佢工作環境本來就充滿住呢種以物質作競技嘅對手。
 
阿凡從來唔會明白阿兒嘅處境,而阿兒亦慢慢離開阿凡嘅最初。
 
終於都係要去到分手嘅一日。
 
呢一日阿兒約咗阿凡,去佢哋以前成日拍拖嘅地方。阿兒全日一句說話都冇講,阿凡隨和嘅性格冇追問點解阿兒會咁樣,佢只係努力咁樣保持住呢個約會嘅氣氛。
 
最後阿兒望住阿凡,一言不發咁一直望住阿凡。
 
「妳係唔係有說話想講?」
「嗯。」
「咁妳講啦。」
「阿凡,我想…」
「妳係唔係想分手呀?」
「…………」
 
最後,佢哋嘅關係就喺阿兒預計之外咁完結咗。阿兒一直預計阿凡會大吵大鬧,佢可能會發癲大叫,又可能會一路咁問阿兒點解,但結果統統都冇。
 
阿兒希望發生以上其中一樣事件,而令自己冇咁難過。但阿凡最後只係安靜咁離開,離開前只係講咗一番說話:
 
「由我哋嘅世界有改變開始,我就已經知會有呢一日。我哋大家都唔需要負責或者難過,愛情本來就好似音樂椅咁,音樂轉一次,就代表我哋嘅環境轉一次。由始至終,你身邊嘅人,係唔係同一個人都好,當中都一定會經歷好多好多唔同嘅改變。
 
保重。」
 
薛可正Facebook Page
http://www.facebook.com/sithoching

COMMENT