男人的Fantasy (八十二)《綠豆》與《男人唔可以窮》
圖片來源：互聯網
最近朋友間都興起一個話題，就係討論ViuTV播映緊嘅劇集「綠豆」，一套以都市多角男女情做題材嘅劇集。
我未仔細睇過呢套劇，但每晚睇佢哋喺WhatsApp討論，就已經覺得好有趣。每晚都聽到佢哋講林保怡嘅角色有幾細膩，又或者係廖碧兒有幾慘，我都總係覺得呢一類劇集咁受歡迎，係因為大家都鍾意睇自己。
城市愛情故事，是他也是你和我；其實不外係速食、外遇、掙扎同決擇，統統都係愛情路上走到一把年紀嘅我哋都經歷過。呢一種係自己睇得好過癮，但同伴一齊睇就要好小心翼翼嘅故事，因為稍一唔小心，你俾對方發現你都曾經有戲中遭遇時，你就真係周身都唔得閒。
而自己一個睇嘅時候，我哋就好似搵到共鳴一樣。愛情世界入面，好多事本來就唔會太合理，有時有啲選擇就連自己都覺得離譜，但可以推得郁你去做呢啲咁離譜嘅選擇，呢啲就係愛情。
連自己都覺得唔合理嘅情況下，我哋搵到共鳴。個感覺就好似俾人扶你一把咁，仲要係大家互不認識，我只不過喺免費電視台中同你萍水相逢，你話呢種心靈雞湯有幾咁濃郁。
個情況就同我當年寫男人唔可以窮一樣，薛可正同張以娜，其實就係世人對愛情嘅兩種狀態。每個男人都同我講佢同薛可正好似，因為薛可正呢個角色本來就係自私自我加自卑，呢啲統統都係男人知道自己擁有但從來唔肯承認嘅劣根性；而張以娜係一個好偉大嘅人，所有女人就會同我講，佢以前都做過張以娜，因為所有女人喺愛情入面都覺得自己係非常咁偉大的。
我唔理大家覺得呢種配對有冇落差，但的確可以令好多人對某一種執著而釋懷。前面都講咗，愛情世界入面係可以有好多離譜決定，因為每個人嘅愛情世界都係無譜。我哋成日嘗試喺無譜入面搵出理據同合理，但其實最後都係冇用。
呢一樣就係愛情嘅本質，想自主又想被認同嘅本質。仲唔明呀？唉你返去睇多啲劇先講啦。
薛可正Facebook Page
http://www.facebook.com/sithoching