2016/06/24

男人的Fantasy (八十三)愛情示眾

7_ways_to_show_your_love_136754769
 
圖片來源:互聯網
 
「喂喂喂,你哋睇下,呢條女又自己一個去旅行。」
「佢邊係自己一個呀,自己一個邊有人幫佢影相呀?」
「可能路人呢?」
「呢張喺房影架,你搵個路人入房幫你影相呀?」
「唔使估啦,呢個年代好多人都唔會公開自己同邊個拍拖㗎啦。」
 
我坐喺Starbucks,聽住隔離幾個女人拎住電話,對電話入面個朋友張相評頭論足,真係吹到啤一聲。
 
幾時開始,我哋一定要俾人知道,我哋同邊個拍拖,又或者係同邊個分手?個世界就係咁奇怪,當有咗好多平台,可以方便好多人將自己私生活放上網嘅時候,就會形成一股風氣,其他人都要跟住呢堆先驅,去將自己所有點滴暴露人前。
 
我有個朋友叫Z,佢係屬於三個月都唔會更新自己facebook嗰一類人,更加唔好話同男朋友影相放上網。有一次聚會,一日更新自己facebook五次嘅阿融問Z:
 
「喂,點解妳成日都唔update facebook架?」
「我點解要update facebook?」
「咁我唔知妳近況嘛。」
「想知我近況,點解妳唔打俾我?」
 
阿融俾Z呢句似有心但無意嘅說話秒殺咗,然後好樣衰咁自己行埋一邊,冇再同Z講嘢。不過呢一句說話,一直喺我腦入面轉嚟轉去,我喺度諗,到底我哋呢個世代嘅溝通生態變成點?
 
好似阿融呢類網絡動物,食瞓屙都喺網絡發生,每日食三餐都要放上網俾人知,我真係好怕有一日開facebook會見到佢直播自己屙屎。佢自己係一隻網絡動物,慢慢就會覺得,其他人都應該要係網絡動物,好似佢咁將自己所有展示人前。
 
所以我哋慢慢會聽到好多,本來唔存在嘅批評聲音,令到個世界愈來愈多不和諧。
 
一樣米養百樣人,唔可以否認有好多人心思會比較細密,唔想自己嘅愛情史好似歷史文案咁隨時可以俾人翻閱,所以最後寧願唔將所有事放上網。我有時覺我人個做法幾無奈,就好似未曾快樂,就要諗同對方會有分手一日,跟住好多外人就會對呢份感情加鹽加醋。
 
科技會隨住時間而變得日新月異,但我希望我哋嘅同理心,永遠都可以保存。
 
薛可正Facebook Page
http://www.facebook.com/sithoching

COMMENT