2016/06/30

男人的Fantasy (八十四)夢想職業

3_593
 
圖片來源:互聯網
 
我細個時候有兩個夢想職業,第一個,係揸的士。
 
因為我住屯門,當時都仲係八十年代,喺冇西鐵嘅情況下,我哋出入九龍只可以靠一條仲未擴展嘅屯門公路,所以對小朋友嘅我嚟講,出屯門公路就等如有街去,屯門公路就好似我嘅彩虹橋…呀唔係,係烏托邦一樣。
 
究竟點樣可以一朝早就自由地出入屯門?咪就係做的士司機囉,仲要有得聽電台。呢個諗法喺我個腦入面停留咗好幾年,直到之後我睇咗一套戲,我夢想中嘅職業又變成另一個。
 
十四五歲時遇上杜琪峰導演嘅一套「十萬火急」,令我對兩件事同時認真起上嚟,就係電影同消防員。我第二個想做嘅職業,曾經係消防員。
 
睇呢套戲,令我知道乜嘢係消防員生活;亦都開始學人去了解,點解一個鏡頭要咁樣拍而唔會咁樣拍。
 
後來,我又慢慢學識愈來愈多我唔知嘅事,但電影同消防喺我心目中,愈走愈兩個方向。我由電影入面搵到快樂,搵到好多夢一般嘅構思;但喺消防員身上,我因為好多新聞而知道乜嘢係高溫火,乜嘢係閃燃…
 
到呢個時間我終於知道,呢一個夢想職業,係一個偉大嘅職業。「一個災場,所有人都走出嚟,而消防隊偏偏要走入去。」呢一句說話其實已經概括咗呢個職業嘅所有,每日都用生命去守護其他生命,用最好嘅體能、狀態去準備所有,係唔係每個人都可以做到?
 
至於我,係第一個就淆底嘅人,但呢一個氛圍一直圍繞住我個腦,每次有大火災出現,我都會好聚神咁睇住電視,希望所有消防員都可以平安大吉,整整齊齊。
 
好不幸咁,上星期一場迷你倉嘅大火,帶走咗我哋香港兩個年青嘅消防員。科技發達,除咗見到電視上新聞報導之外,我仲喺網絡上收到一啲應該係死去消防員嘅同胞錄音,聽到每一個人都好心酸。
 
夢想職業四個字,包含的實在太多太多,此刻,藉此為服務市民而付出嘅人作衷心感謝。
 
薛可正Facebook Page
http://www.facebook.com/sithoching

COMMENT