2016/07/08

男人的Fantasy (八十五)易地而處

2016_07_08_薛可正_MenClub_易地而處
 
圖片來源:互聯網
 
我從來都無諗過,我同阿恩會因為工作而分開。
 
我係一個傳媒編輯,每日工作時間差唔多十二個鐘。計埋坐車時間,正所謂有返工就無放工。我成日都覺得,做傳媒嘅人,真係連生活都無資格。
 
女朋友阿恩係一個普通OL,每日朝九晚六,準時放工準時生活準時人生,佢永遠都理解唔到,我做傳媒嘅嗰份壓逼力。我每日返工就好似打仗咁,一有突發新聞,唔好話食飯,你連屎都唔使屙。
 
偏偏好多時,阿恩就會打電話俾我。
 
「食咗飯未呀?」
「有冇飲多啲水?你咳呀。」
「記得去拎返張冷氣被呀,唔係你無得冚,凍死你呀。」
「點呀?好忙呀?」
 
頂妳個肺,煩夠未呀?我咁大個人使唔使吓吓俾人問住我食咗飯未飲咗水未?仲細呀當我?我啱啱先俾老闆照完肺咋。我知道呀我知道呀,阿恩係對我好,但點解佢總係唔明,我工作嘅環境係點樣?講少句廢話得唔得呀?
 
「好煩啊,俾我做哂啲嘢先得唔得呀?」終於有一次,我忍唔住向電話入面嘅阿恩大叫。從此之後,佢就好少打呢類我覺得好煩嘅電話俾我。
 
無幾耐,阿恩轉咗工。佢搵咗一份銀行嘅工作,新工作令佢好忙,忙到我哋連見嘅時間都無。無幾耐,我因為做錯一件事,被公司炒魷魚。
 
我同阿恩角色好似對調咗,佢工作忙到飛起,我就日日留守屋企玩手指。時間開始多,我開始拎返同阿恩好多以往嘅相同短片出嚟睇,有時睇到好掛住佢,我會打個電話俾佢。
 
「喂,阿恩呀,食飯未呀?」
「喂,忙緊…」
 
阿恩收線嘅一刻,我有種好心碎嘅感覺,我終於知道,當日阿恩收到嘅,到底係一個幾唔開心嘅訊息。
 
收線之後,我覺我時間好漫長。無幾耐,我又想打電話俾阿恩。我諗咗好多個藉口,有新鮮嘅亦都有關心嘅,但最後我發覺,所有嘅藉口,其實阿恩都已經問過我唔止一次。
 
人,係咪到底要去到絕望,先識得去諗自己,曾經係咪可以做得好少少?
識得易地而處,就係對自己感情好少少嘅做法。
 
薛可正Facebook Page
http://www.facebook.com/sithoching

COMMENT