2016/07/15

男人的Fantasy (八十六) 寂寞

the-lonely-man
圖片來源:互聯網
 
已經唔記得,上一次開心笑係幾時嘅事。
 
今晚好攰,我幫公司傾成一單五百萬生意。亦即係話,公司未來一年嘅皮費我都唔需要擔心。全公司嘅員工都好開心,我哋開咗一個慶祝會,一如以往咁樣大家又飲又食,然後聽日大家都放假一日,開開心心咁休息吓…..
 
我呢個做老闆嘅,喺員工走晒之後繼續埋頭苦幹。我嘅生活係無放假,工作就係我嘅世界。我未結婚亦都無女朋友,父母住新界北,我每一次由港島嘅屋企入去睇佢哋,一來一回要兩個幾鐘,所以我選擇自動轉帳生活費俾佢哋,佢哋鐘意點用就點用。
 
我無咩嗜好,自己一個人行街就係我最大樂趣。我鍾意觀察其他人,因為我鍾意靜態嘅事物。慢慢,我嘅生活變得愈來愈慢,除咗工作上要加快反應同其他人接觸之下,基本上我係一個好慢嘅人。
 
有時覺得,慢到…好似同個世界脫咗勾咁。
 
我唔識最新嘅App,亦都唔知有乜嘢戲上映緊,電話入面嘅WhatsApp我好少睇,因為多數都係唔太熟嘅朋友夾硬拉我入去啲Group,我唔想用多餘時間去做多餘嘅事,有時間點解我唔睇多兩份文件?
 
買玩具係我喜好,用自己能力,將細個買唔到嘅玩具,一件一件咁買返自己身邊。我屋企有好多玩具,我用最靚展覽櫃將佢哋放好。然後每晚,佢哋都會企喺度郁都唔郁咁陪住我瞓覺。
 
我起身鍾意自己煮早餐,因為餐廳太嘈,我唔鍾意食飯時聽到其他人講嘢。慢慢溝通就好似係我一種工具咁,有用時拎出嚟,無需要時我就會收返埋…
 
我以為我放開身邊所有我覺得煩躁嘅事,我就可以專心去做我想做嘅事。父母、朋友、嗜好、生活、情緒……………快樂。
 
我有能力選擇我想選擇嘅事,最後我好寂寞。
 
我哋為咗生活而寂寞,最後變成為咗工作而寂寞。
 
薛可正Facebook Page
http://www.facebook.com/sithoching

COMMENT