2016/07/29

男人的Fantasy (八十八)誰能逼我將就

2016_07_29_ MenClub Column_誰能逼我將就
2016_07_29_ MenClub Column_誰能逼我將就 2
 
圖片來源:互聯網
 
最近出咗一本新書,書展賣得唔錯,嚟緊就會去到第二輪之書局作戰。本書嘅題材,係講一個退休男人嘅心態,同家人嘅相處,原來好多時唔係我哋旁人諗得咁簡單。
 
今次係一間NGO搵我合作去寫呢個題材,寫之前我問過自己好多次,有冇足夠嘅認知去發揮題材,教人嘢唔敢講,但誤人子弟嘅事我一向好少做。最後叫自己做多小小準備功夫,唔識就去學,永遠係最好嘅態度。
 
做過一輪資料搜集之後,我開始慶幸自己有接受呢個工作,因為原來你行前一步,就可以知道自己世界以外好多唔知道嘅事。
 
男人退休係一個乜嘢概念,我以為就係落公園吹水捉棋撚雀,唔使做日日爽歪歪咁過日晨。唔使做喎幾好呀,但我睇過一個受訪者講,係就係唔使做,但係好似等死咁,有咩值得咁開心?佢哋大部份人一生人都為人人打拼,出去衝鋒陷陣咗幾十年,辛苦就係辛苦,但傳統男人就係以呢種辛苦做養份,支撐住自己每一日去再努力。退休就係直接話你知,佢永遠都唔會再有呢種養份。呢種改善係直接影響到生命、價值觀同意志力,而去到六十過外嘅一眾朋友,仲有冇能力去改變呢一種咁大嘅落差,正正就係我哋想關心嘅事。
 
世界係無限大,因為我爸爸好早就離開咗,我以為我唔會咁快體會到嘅男人退休之事,透過寫呢個故事,認識同認知咗好多。好多我哋可以關心嘅事,其實真係一個舉手之勞,令我哋準備得更多更好,唔會令自己後悔。
 
家人係我哋人生最重要嘅一環,亦都係呢個原因,希望大家支持呢本書,但我又唔會咁現實叫大家一定要買書,如果有興趣嘅,大家去「紙言」呢個網都可以搵到我所講嘅呢個故事。
 
希望我想講嘅事,都可以令你地有所體會,感激。
 
薛可正Facebook Page
http://www.facebook.com/sithoching

COMMENT