男人的Fantasy (八十九)溝女講天份
圖片來源：互聯網
呢一篇文，唔適合一啲才俊或者係富二代去睇，如果你自問係類似呢兩個範疇嘅人，可以去右上角CLICK一CLICK個交叉走先。
有條毒L問我：「正哥，你識寫嘢，咁你識唔識講嘢？」
「乜春識唔識講嘢呀？你當我啞架？」
「唔係呀，我係話識女仔嗰種。唔知點解我硬係唔識講嘢，想行埋啲女仔度搵個話題，都總係賴嘢。」
「講啲例子聽下…上次你咪同我講你識咗個好鐘意bigbang嘅女仔，你點撩佢講嘢？」
「我咪問佢bigbang有咩好聽，個權志龍又矮，同埋介紹啲日本動漫主題曲佢聽呢啲先係正嘢呀。」
「………………………………」
「泡菜係得個包裝，你睇吓套太陽後裔，……下刪二千字。」
「夠喇夠喇…仲有一次你話有個女仔同你講佢病咗，你WhatsApp問我要點答，我教你關心吓佢，最後你點答佢？」
「哦，我話：咁我唔阻妳喇，妳休息下啦 咁囉。」
「………………………………」
「我硬係覺得好似阻住佢咁，你知女人一唔舒服就發火，不過我最尾都介紹咗幾條link俾佢，叫佢悶就睇吓動漫。」
「…………………你人生除咗動漫仲有咩？」
「玩跳舞機囉，上次落機舖有個女仔仲讚我跳得好叻，叫我俾電話佢。」
「咁咪得囉，仲唔食住上？」
「佢話佢二百三十幾磅，想跳舞減吓肥。我有俾電話佢，但WhatsApp講咗幾句，佢就無咩覆我。」
「點解？」
「唔知係唔係我講錯嘢。」
「你問佢咩？」
「我問佢咁肥平時喺邊度買衫…但其實我有解釋，因為我四十幾歲個表姐都好似佢一樣咁肥，可以介紹我表姐去買衫。」
「所以…你問我識唔識講嘢。」
「係呀，我成日覺得自己唔識講嘢。」
「的確係…係有小小難度。」
「我都知……係呢正哥，你咁肥以前係點識女仔？你又唔係靚仔，講嘢一定好叻，所以我先問你。」
「……我有事走先，拜拜。」
薛可正Facebook Page
http://www.facebook.com/sithoching