男人的Fantasy (九十)男女之情
圖片來源：互聯網
男人同女人之間，到底會唔會有純粹嘅友情？
點解一男一女出街睇戲就係互溝？又點解有夫之婦同個朋友喺街坐低傾吓偈就係偷食？食飯可免則免，睇多場戲就直情係過份？
撇清成世人都好少接觸異性嘅宅類男女去講，其實大部份都市人生活入面，都總會遇到好多投契嘅朋友，一開始時無所不談，大家會發現大家有一份親切感，佢哋無憂無慮咁交心，直到佢哋覺得呢一份感情要公諸於世時，有一個問題就會行到去佢哋面前。
一男一女可唔可以做好朋友？
當然，好靚同好樣衰嘅人可以有少少特權，因為評頭論足呢個技術只係需要一個話題。啲三姑六婆如果見到其中一個主人翁係非常樣衰，通常呢啲男女友好關係都會被淡化多少。無他嘅，踩人樣衰點都會令自己覺得自己係靚少少嘛。
但如果男女都屬於正常人級別，旁邊嘅三姑六婆就會拎出把道德尺同你哋慢慢計數。以前我覺我好正常，但慢慢就覺得，咁樣會浪費人生好多值得留低嘅同埋事。
一個男人行到咁上下年紀，其實就自然明白，搵一條女去搞嘢係容易過搵一個可以交到心嘅朋友好多。人生路走到一半，壓力一日比一日多，朋友一日比一日少。唔係你唔想識朋友，係你發覺有好多人根本就做唔到朋友。佢哋可以做同事、生意伙伴、鄰居、波友…但唔會做到朋友，因為佢哋唔可以令你打開把口，將你嘅心事同佢哋分享。
所以當我哋男人遇到一個可以交心嘅朋友，而不幸佢又係女人時，人生交叉點一定會泛起小小漣漪。因為如果對方同時視你為好朋友時，呢份好感係最容易令人有錯覺，以為人哋因為你靚仔而鍾意你。
朋友，呢個位你好勒住。停一停諗一諗，你個方向係唔係想為咗一次半次搞嘢，而失去咗一個可以傾訴嘅好對象。咩話？可能溝咗仲傾得埋？唔好玩啦，唔會啦…你最唔講得出口就係情史，如果對方變咗你嘅情史之一，佢仲點會同你噓寒問暖知凍知熱呢？
唔好因為誤會同藉口，令本來美好嘅事變質。Keep到一世，你就係叻仔。
薛可正Facebook Page
http://www.facebook.com/sithoching