圖片來源：互聯網
 
王寶強離婚嘅事件，全世界包括佢一班小生兄弟都全天候撐佢。其實我唔明撐佢乜嘢，正所謂綠帽已戴，佢除得夠快嘅話，真係多得呢班郁吓都有過萬點讚嘅兄弟，去幫佢宣傳呢件事。
 
有一種支持，叫順著走。
 
王寶強今次嘅事，係人生以內嘅事。乜嘢係人生以內嘅事？就係生老病死，高低起跌嘅事。唔會有幸與不幸，一個大明星，國家級演員，拍套戲等如平民如我呢啲半世人嘅收入，咁叫幸福喇啩，但偏偏佢老婆就係唔愛佢，仲要同最近嘅人搞埋一齊。証明呢個世界無必然，唔係男人個袋好多錢就等如每日快樂；亦都唔係個老公有知名度有錢錫自己，個老婆就唔會走。
 
馬蓉點解會做出呢種事，無人知，可能連佢自己都唔知。你當佢鬼揞眼又好，個腦入咗水都好，反正佢就係做咗。人生唔係一加一，唔係老公錫妳又有錢，就一定完美落幕。人生有好多細節，每一個細節就係分岔口，好似畫鬼腳咁，由你第一步慢慢行到最尾一步時，你就會發覺好多事已經唔係自己控制。
 
講到呢度，係咪講得個世界好灰暗，好多事都無保障？講得啱，人生係真係無保障，但其實成個世界咁多人，一日咁多人出世咁多人死，點解我地會覺得人生係會有保障？
 
我覺得人生就好似一個大賭場，入面乜嘢人都有。有成功嬴錢走、有輸到底褲都冇、有正面樂觀唔怕死，亦都有輸個崩就想跳樓。想做邊一類人，有樣板你睇。錢就得咁多，唔滿足就行埋去落注，嬴同輸都有可能，但最緊要玩得起。
 
輸咗獲勁嘅唔好賴死，快快手起身去轉個運，趕走啲負能量再嚟，邊個知道聽日我哋會點？王寶強遇上男人最痛嘅事，但唔等如佢將來都會遇到一樣嘅事。
 
見到石頭識兜路走，呢啲先叫聰明。
 
薛可正Facebook Page
http://www.facebook.com/sithoching

Uncategorized 個回應 | 7,580 個已瀏覽 |