男人的Fantasy (九十二) 不離的愛
圖片來源：互聯網
最近睇到一單新聞，因為有腦癌而失智嘅老公走出街唔見咗，佢老婆喺掛風球時周圍咁搵佢。件事網絡瘋傳，得到傳媒幫忙，好彩最後個老婆搵返個老公時，老公只係受咗輕傷。
翻睇幾段新聞，我見到位老婆由出事到搵到老公，都係好鎮定。向途人派傳單，形容老公外型時非常清晰，整個人嘅情緒亦都保持得好穩定，因為危急嘅時候，我哋嘅情緒最需要幫我哋做救急嘅事。
直到搵到老公之後，老婆誠心嘅幾句答謝，都係令我動容。佢手拖住老公，一邊向其他人答謝，但對眼一直都無離開過自己老公。
呢個係長年累月嘅一個狀態調整，係一個好高情商表現。
夫妻都係四十幾歲，丈夫係經濟支柱，有一個小朋友。丈夫有病之後，屋企經濟影響不在話下，睇住老公身體一日比一日咁差落去，開始唔可以自理，唔認得自己，最後…
對唔住，我呢類悲觀嘅人諗嘢就係咁搵自己笨。
面向一個幾乎要奇蹟先打救到嘅情況，就好似一個唔開工等中六合彩先生活到一樣，我哋係可以有盼望，但自己心中有數都知道前路係無乜得行。但呢位老婆都依然保持自己最樂觀一面，去準備眼前一個又一個，可能會令自己招架唔住嘅情況。
除咗愛，仲有乜嘢可以令佢支撐得住？
但呢份愛，到底又係點嚟？
現代社會嘅愛太廉價，每個人都有自己價值觀，金錢面前可以低頭，但愛情面前好多人都覺得，自己係最重要。最起碼每逢面對愛情上嘅困境時，都會諗自己點解要遷就對方。俗語有「森林論」，即係你無咗眼前呢碌木，後面咪仲有個樹林，驚搵唔到更好嘛？
其實後面搵唔搵到更好無人知，但呢句說話只係叫大家，「愛」唔一定要珍惜，因為愛唔似我哋嘅手手腳腳斷咗就無，愛係可以取代，係可以割捨。
我習慣咗呢種都市諗法，所以我唔習慣呢位太太嘅愛。佢令我突然諗起，人生走過一半，見過試過好多事，幾有錢幾有權嘅人，都有自己一個招架唔到嘅時候。我哋一路唔知自己想搵啲乜嘢，又或者係我哋知道自己搵唔到自己想嘅嘢。
呢樣嘢真係好罕見，叫不離不棄嘅愛。
薛可正Facebook Page
http://www.facebook.com/sithoching