男人的Fantasy (九十三) 兩把尺
圖片來源：互聯網
「妳最好同我講清楚，呢個男仔係邊個嚟，點解佢會喺WhatsApp同妳講嘢咁曖昧，妳哋有冇單獨出過街？」
志明就係咁樣，喺旺角大街上面，對住自己嘅女朋友Gill大叫。
「同事嚟咋，佢份人係咁口花。」Gill極力咁去解釋，但完全唔可以令志明嘅怒火減退。
「佢份人係咁口花？妳同佢好X熟呀宜家？好清楚佢份人係點？」
「我唔係咁嘅意思…」
「普通同事點會叫妳乖乖地去瞓覺，仲叫妳傻瓜？點解之前對話會無晒，妳Delete咗？點解Delete？」
「我部電話無咩位，咪Delete好多無用嘅對話囉。」
「妳一日影成千張自拍唔見妳話無位？」
志明表現實在太激動，Gill極力咁克制自己，避免令到志明更加激動。兩個人企喺街頭，相對無言。剩低嘅，只有志明沉重嘅呼吸聲，仲有微微嘅細雨。
五分鐘後，始終由Gill去再打開話題。
「唔好咁敏感好無？我哋係無嘢。」
「我唔想再講，我返屋企，再見。」
志明講完呢句說話，轉身就走。儘管佢聽到身後Gill嘅挽留，但佢依然頭也不回咁離開。Gill一直再打電話俾志明，但志明無接聽。
直到十分鐘後，志明坐上小巴，Gill亦都停止打電話俾志明。
志明拎出自己手機，但佢無打開WhatsApp，佢走到微信入面，搵出一個叫Joey嘅聯絡。
「Joey，好悶呀，傾下偈。」
「唓，我成個鐘前叫你你又唔覆我，明明見你WhatsApp有online。」
「忙緊嘛，唔好嬲啦。」
「宜家到我唔得閒喇。」
「做咩呀？男朋友上咗妳屋企？」
「係呀，知就好啦。」
「咁我唔阻妳喇，仲有冇唔舒服呀？記得食藥呀傻豬。」
「知道喇，再講啦。」
「記得同我食飯呀，成年幾無見面，就嚟變網友喇我哋…」
Joey無再覆志明，志明關閉微信後，望住WhatsApp嘅icon三秒，但最後都無再打開。佢將手機放入褲袋，合埋眼準備瞓一程長途車。
薛可正Facebook Page
http://www.facebook.com/sithoching