圖片來源：互聯網
 
「簡單點，說話的方式簡單點，遞進的情緒請省略，妳又不是個演員，別設計那些情節。」
 
最近經常都聽薛之謙首「演員」，歌詞毒到無人有，第一句已經好似一碌木棍咁打中我個頭。
 
正所謂遊走情場多年，演員呢樣嘢，自己做又做過，對方亦都做過。兩個相愛又或係曾經相愛嘅人，就係因為緊張大家或者想對方緊張自己，好多時都會做好多無謂嘢，希望可以令對方見到自己。
 
「遞進的情緒請省略」呢句真係準確，好多時見到啲情侶嘈交，其實就好似一場博弈咁，大家睇住對方嘅表現，估計對方嘅情緒，再去計算兩個火頭中間，自己仲可以有幾多位置去揮霍。有時捉住對方一兩句有心無意嘅說話，遞進嘅情緒就正好用得上，攝個靚位將對方打落下風。
 
兩個相愛嘅人，因為一時情緒，好多時會立刻變成敵人。早排同對夫妻朋友食飯，老婆席間無啦啦話個老公早兩日發酒癲，因為一餐宵夜問題搞到兩公婆大吵大鬧，老婆指住個老公話：
 
「佢係咁發酒癲，痴線。」
 
老公唔示弱，立即反擊：「夠佢癲，明明自己粗身大勢，鬧交嗰時仲去打自己個肚。」
 
「低能呀你？」我即鬧。
 
「鬼叫佢衰呀，遲咗十五分鐘返嚟仲鬧我。」
 
「都係丫，打親個肚點算呀？無腦呀妳？」
 
你話幾咁無謂呢，本來係老公開開心心買宵夜俾老婆食，最後就係因為塞車所以遲咗，開心嘅事變咗爭啲搞出人命嘅事，所以我成日都話，人喺最嬲嘅時候數一二三，再退後多一步，你就會發現本來好嬲嘅事已經唔嬲，好想發火嘅事已經無感覺。
 
所以好多時唔使兜個大圈，冷靜吓自己，搵條小路，仲快到達目的地。
 
薛可正Facebook Page
http://www.facebook.com/sithoching
 

Uncategorized 個回應 | 4,081 個已瀏覽 |