圖片來源：互聯網
 
畢彼特夫婦離婚消息傳到耳邊時，我的確有小小驚訝。曾經以為愛情係一種歷練，而歷練係來自生活同眼界。兩個見盡大場面，上過奧斯卡跑過戰地嘅大人物，經營愛情應該唔會太困難吧。
 
但最後我發現，塵間上所有愛情入面嘅，都只係一個一個有喜怒哀樂嘅尋常普通人。
 
兩夫妻身家過億，名氣外表應有盡有，呢啲就係我哋一般人眼入面嘅成功同快樂人生。基於一段快樂人生下嘅愛情，結局好似白馬王子白雪公主咁同白頭到老應該係意料中事吧。但最後得出嘅結果，對我哋呢一類老百姓嚟講都唔知係好係壞，好嘅係其實我哋同呢類接近神嘅明星，喺愛情路上嘅level其實差得唔遠，我哋會煩嘅其實佢哋都會，原來喺呢個世界上有一塊地方，我同佢哋係從來如此接近；而唔好嘅，就係現實都話俾我哋知，愛情係會折磨我哋一世，無論我哋以為再搵多啲錢就可以同伴侶快樂少少，又或者係再事業有成多一格半格，我喺愛情路上就唔會再咁自卑，Sorry，咁麻煩你哋繼續唔快樂同繼續自卑，因為畢彼特兩公婆都搞唔掂嘅事，我哋係無得救的。
 
佢哋嘅史密夫同史密妻曾經就好似我一個指標咁，兩公婆唔一定分高低，各有所長各有能力同時，喺大家可以毀滅對方嘅情況下選擇大家去愛護對方，有咩愛情可靠過喺槍林彈雨之下？有咩信念係可靠過生死關頭之前。
 
睇住佢哋呢套一秒定情嘅戲，再睇佢哋手拖手去收養孤兒，再生兒育女，我覺得呢個世界上真係有完滿愛情呢一件事。喺呢段關係入面，乜嘢包容、體諒同了解已經係唔需要再提嘅事，已經做過嘅一切就係呢啲基本要求嘅最好證明。
 
最後證明，我錯咗，係我一廂情願嘅無聊依賴，天真到死。
 
薛可正Facebook Page
http://www.facebook.com/sithoching
 

Uncategorized 個回應 | 5,353 個已瀏覽 |