男人的Fantasy (九十七) 男人的高高低低
圖片來源：互聯網
我認為一個男人，要經歷過高高低低，先可以叫做一個真正嘅男人。
但到底乜嘢係高高低低，呢啲嘢真係空泛得嚟又因人而異。我細細個試過一次，用五佰蚊買嚟嘅新衫，唔使兩個鐘就唔小心俾油漆毀滅咗。當時我成個人係崩潰，我向住個天大叫：點解呢個世界上要有油漆，仲要係紅色。
跟住再大個少少，我同一個拍拖三個月嘅女朋友分開，而分手嘅方法，係佢同我講佢俾我另一個朋友溝咗。世界末日未？係咪好值得大喊一場？
但我無。
我只係輕輕咁坐喺屋企，好好咁思考一吓，點解我個心會咁痛。比起上一次件衫，我大叫完我就覺得無事。但點解今次，我個心會真係痛到好似唔想講嘢咁？我成個人都好似無晒心機，就連最鐘意食嘅老麥我都唔想食。
到慢慢，出嚟工作，又識一個女朋友，跟住又分手。再識多個女朋友，轉工，俾人炒魷魚，跟住再分手…喺呢啲過程入面，我知道每一個人都會有高低潮。正當我二十幾歲時，我就同自己講，我已經試晒人世間最唔開心嘅事，往後嘅我會更強大。
當時我又大叫，Sorry我真係ok鐘意大叫：「起碼，起碼我知道呢個世界係咩玩法!!」
十幾年後我知道自己錯咗，原來當年嘅事，只不過係小菜一碟。最近嘅我，終於知道乜嘢係低潮。
低潮係，你遇上所有嘅事都係唔好、你所有計劃嘅事都係唔可以完成、你所有嘅期望嘅事都唔會望到終點。我意思係，無論你花幾多努力，最後結果都同上面三句嘢一樣：乜，都，冇。
你會好懷疑自己，覺得自己係一個廢柴。無錯呀，係連你自己都對抗緊自己，用盡全力咁將你一直信賴嘅生存嘅人生信條都推翻。係呀，唔會理你死活，你唔好以為自己扮到個樣好似想死咁，呢啲問題仲會停止。
佢哋係會同你講，就算你死，都只係解決到自己條命，而唔係解決到所有問題。
恐怖嘛？
但我諗到最尾，都係諗到文章開頭嘅嗰一句：
一個男人，要經歷過高高低低，先可以叫做一個真正嘅男人。
所以我寫咗呢篇文，紀錄吓自己有過咁黑仔嘅一段時間，第時拎嚟笑下都好。
薛可正Facebook Page
http://www.facebook.com/sithoching