2016/10/06

男人的Fantasy (九十八)最親密嘅陌生人

f19f0dd7-c6a0-4524-9d54-6b72207de23f
 
8f83c8451d93913a9fa1b308a93c2a58
 
圖片來源:互聯網
 
阿龍最近同拍拖六年嘅第二任女朋友,終於都分咗手。用「終於」呢兩個字,係因為呢段感情相處,話咗俾佢哋兩個知,佢哋本來就要分手。性格、嗜好、條件所有所有都只可以用「不合」去形容,佢哋唯一相近嘅地方就係太善良,大家都唔想傷害彼此嘅心,一拖再拖,最後反而傷害咗彼此嘅青春。
 
阿龍分手後好失落,一個人無聊時就亂咁睇Facebook,最後竟然喺朋友嘅朋友度,見到八年前分手嘅女朋友,天怡。
 
「嘩,八年都無咩點變樣喎。」係呀,男人睇舊女朋友多數都係睇呢啲先。因為妳八年嚟嘅生活其實唔係好關我哋事,我哋只係想睇吓喺呢個咁短暫嘅時間,可唔可以搵一個短暫而又就手嘅各樣伴侶。
 
特別係曾經跟進嘅舊檔案,都係嗰句,容易Pick up丫嘛。
 
阿龍加咗天怡,而天怡亦都好大方咁接受。
 
「妳最近好嘛?」呢句所有舊情復熾嘅開場白龍虎榜第一位,成為咗佢哋再次通話嘅一度門。天怡呢幾年都好好,有過幾個男朋友,轉過幾份工,當中亦有遇過一兩個仆街,包括男朋友同老闆。
 
阿龍坦白向天怡講出自己同一個拍拖六年嘅女朋友分手,大家寒暄幾句,感覺良好。阿龍好似生活入面有返少少色彩,因為天怡保養得真係幾好,阿龍個心一直諗,Facebook伴侶又好生活伴侶又好甚至性伴侶都好,起碼可以令佢分散失戀嘅悲痛。
 
佢哋保持咗兩個星期嘅Facebook私訊對話,阿龍鼓起勇氣問天怡拎電話。
 
「我電話無改呀。」
「哦係咩……但係我之前Del咗….」
「哈哈,好啦 99919689。」
 
阿龍好開心,就覺得好似進一步咁,佢個腦開始諗返,好多年前同天怡第一次去澳洲旅行,嗰六日五夜大家晚晚都幾乎無得瞓嘅甜蜜時光。佢好快咁加咗天怡WhatsApp,跟住開始對話。
 
由開頭嘅文字,到兩日後天怡因為太忙,用語音發咗一條訊息俾阿龍。阿龍聽完之後,感覺有少少錯愕。
 
呢把聲,佢覺得好陌生,佢一聽再聽,竟然完全搵唔到,當日同自己走過一段日子嗰個天怡嘅感覺。呢個係天怡,但阿龍突破醒覺,呢個唔係自己心入面嘅天怡。
 
阿龍終於知道,時間過咗就係過咗。八年時間唔短,天怡已經改變成另一個,一早同阿龍愈走愈遠嘅天怡。阿龍呢一刻先知道,自己就好似動物本能咁,單向咁走一條路,前面路行唔通,就想倒轉行返自己一路走嚟嘅入口,因為熟悉嘅人或者事物,都係令我哋最有安全感。
 
同前度分開,令阿龍以為喺天怡身上可以搵到安全感,但呢一刻嘅感覺令阿龍明白,呢個只係佢一廂情願嘅諗法。
 
天怡嘅配合可以係出於千萬理由,但唔等如阿龍可以因為呢個原因,而去傷害一個曾經嘅人。
 
而既然分開了
何必又想打擾。
 
薛可正Facebook Page
http://www.facebook.com/sithoching

COMMENT