2016/10/13

男人的Fantasy (九十九) 結婚有幾煩

gameover_large
 
圖片來源:互聯網
 
最近幾個朋友都結婚,經過FACEBOOK睇住佢哋由籌備到接近婚禮,我有一種「萬事俱備,只欠東風」嘅感覺。
 
「東風」唔係講錢,或者係一個好華麗嘅地方,而係笑容。
 
我睇住佢哋由開始構思到睇婚紗、訂酒席再去到準備小禮物,多數人係搞到口黑面黑,唔係大爆粗口就係呻呢樣嗰樣。乜嘢老公唔理嘢、老婆好麻煩、外父突然一定要買樓先肯比個女嫁同埋奶奶話結咗婚之後一定要生仔。
 
我慢慢睇到婚禮對佢哋嚟講就好似一度門,入咗呢度門之後就有排佢哋受咁,真係恐怖。次次同佢哋一見面,我就當然係虛偽到無朋友咁問:
 
「點呀個婚禮搞成點呀?」
 
但多數嘅回覆都係:
 
「搞緊喇搞緊喇。」
「唉唔好x講,好煩。」
「無晒啲錢喇。」
 
全部都係負面說話嚟,搞到我都即時轉話題,問吓上星期場波又或者有冇打FIFA2017會開心少少。其實結婚係開心事,但點解差唔多八成嘅朋友都會為呢個過程而苦惱?
 
我知道好多朋友都想自己婚禮好好睇睇,所有事都精益求精,令自己呢個回憶唔好有遺憾。但日日兩條友嘈到翻天覆地,唔係你鬧我洗大咗個數,就係我鬧你咩都唔做,有好多我見過係鬧到唔結婚……其實咁樣真係一個好回憶?
 
我見到好多現代男女,都將結婚呢件事本末倒置咗,其實呢個只係一個程序,簡單少少講只係一餐飯,正式咁去同你哋班姨媽姑姐講你哋已經結咗婚。如果係教徒嘅,呢個只係你哋兩個攞正牌性行為嘅一個儀式,真係唔好花太多錢(除非你好多錢)同時間落去令到大家感情都有變。
 
婚姻最重要係兩個人點去經營一段一生一世嘅感情,個婚禮搞到幾大幾多人讚都好,對呢段婚姻都唔會有優勢。反而如果為呢件事而開咗個頭唔開心,好多心結都會由呢個時間而開始,因為一個婚禮真係樣樣都講錢,講錢點都傷感情。
 
要忍嘅,留返呢幾十年嚟忍你面前呢個死佬或者八婆啦,仲辛苦過你搞十個婚禮呀。
 
薛可正Facebook Page
http://www.facebook.com/sithoching

COMMENT