2016/10/21

男人的Fantasy (一零零) 公眾的愛

unnamed
 
圖片來源:互聯網
 
有時好明白公眾人物點解拍拖拍到好似偷嘢咁,俾人點問點審,都唔可以公開自己嘅感情,有時都替佢哋覺得辛苦。愛情路上,每個人都只係普通的一個,對住心頭愛時,總想將佢分享俾所有人知。
 
但好多公眾人物就無呢個樂趣,一句講到尾,愛情可以好強大,但好多時候都係好脆弱。試問一段感情本身周旋喺兩個人之間都已經好易破碎,更何況明星們要俾一眾媒體日影夜影,跟住又俾一班網民喺網上日鬧夜鬧。明星都係普通人,「唔想煩」就係佢哋唔公開嘅原因.
 
但感情唔公開,硬係好似一隻無腳嘅雀仔咁,唔完整!有缺憾!點解尋常百姓可以做嘅行街睇戲我哋唔做得?點解我哋嘅感情一定要俾旁人指指點點,呢個又話我係公廁,嗰個又話我男朋友係食軟飯,點解呀?點解先?你哋班人連老豆老母過問吓你同邊個拍拖,都上FACEBOOK開個STATUS咒到佢哋短十年命啦,點解做公眾人物嘅就要俾你哋加上呢啲壓力?
 
嗰份壓力有幾大你知唔知,點解你哋班人食飽飯無嘢做硬係就鍾意喺其他人嘅事上面加鹽加醋,但自己又要自主同自由?好多人話做得公眾人物就預咗,廢話啦,收得老闆人工唔通就預咗俾佢問候呀?呢啲咁奴性嘅說話唔該唔好周圍傳遞呀我話你知。
 
現代社會壓力真係太大,每個人都好似為自己生活上壓力去搵出口。總之邊個俾氣我受,我就搵其他可以出氣嘅出氣口去傳遞,知唔知咁樣做個社會慢慢會變咗點樣呀?
 
有冇睇過杜SIR嘅「大隻佬」,就係因為孫果殺咗張柏芝,所以劉華先會打死隻雀仔呀。係咪好難明?唔緊要,上網搵返套戲睇,睇十次八次返嚟再諗一次我講咩,如果都係再唔明嘅,去我專頁搵我,我解釋你知。
 
薛可正Facebook Page
http://www.facebook.com/sithoching

COMMENT