2016/10/28

男人的Fantasy (一零一) 愛情收獲

2016_10_28_sit_menclub_love reward
 
2016-10_28_sit_menclub
 
圖片來源:互聯網
 
聽許志安嘅「情人甲」,有幾句歌詞係咁嘅…
 
「偉大情史,萬縷萬絲,犧牲幾個人做引子」
 
我哋喺茫茫嘅愛情大海入面,一定會出現過唔少甲乙丙。呢一類情史無論係長又好短又好,有時我哋都總會問,曾經同某一個人一齊,對自己有咩用?
 
諗咗好多年,聽呢首歌就好似俾我一個引子。所有愛情路,終點一站其實都係「修成正果」。有一日我哋會喺感情上洗盡鉛華,唔再愛新鮮,只愛稱身,但稱身嘅呢一個,我哋又有冇能力令佢一世稱身?
 
愛情嘅甲乙丙,其實就係為咗我哋將來嘅稱身而出現。
 
每一段感情,無論長短都好,都係一個學習機會。由我哋嘅一身缺點,慢慢經過年月,我哋會因為一啲事,腦入面突然「叮」一聲,突然會明白咗一啲事。
 
有一個朋友同我講:
 
「阿正呀,我覺得我女朋友真係改變咗我。」
 
呢句說話太廢,咁係改變咗你咩先得架?」
 
「佢改變咗我一啲好多年嘅習慣,由細到大,每一個朋友同我講心事,我都會立即講自己意見。以前我覺得,喂你哋搵得我講,即係覺得我個人有料啦,講嘅嘢啱聽啦,咁我就會即時口若懸河不停俾意見對方。有時病態到,我唔理對方咩反應,我自己就係一直俾意見,直到我哋嘅對話完結。」
 
「咁好正常。」我心諗,喂我都係啲咁嘅人。
 
「唔係呀正,但我女朋友同我講,佢只係想我聽佢講嘢,其實所有事佢都可以處理,佢只係想我知道,佢身邊發生緊一件咁嘅事呀。」
 
聽完之後,我呆咗幾秒。心入面不禁計緊,我以前有幾多個朋友搵我訴苦,最後變咗我嘅意見發表大會。
 
「咁最後你點?」我問佢。
 
「最後我真係一句聲都無出,由得佢講咗半個鐘。最後佢好開心咁笑,我哋再去一齊食飯。」
 
收到意見…但唔講嘢?對我嚟講係一個衝擊價值觀嘅事嚟,但我朋友講完嘅一臉滿足,真係話俾我知佢好似改變咗一樣佢無諗過嘅事咁。
 
衝擊價值觀而得來嘅改變,除咗愛過嘅人,仲有邊個可以俾到你?
 
薛可正Facebook Page
http://www.facebook.com/sithoching

COMMENT