男人的Fantasy (一零二）直入中路
圖片來源：互聯網
阿花今日悉心打扮，為咗見一個兩年無見，但曾經曖昧嘅男仔馬仔。馬仔曾經係阿花心目中適當嘅人選，雙方曾經你來我往咁暗交過一段時間，但最後都係無疾而終。
唔使問點解會無疾而終，現代感情好多時因為對手太多，舊感情真係死咗都唔知咩事。
馬仔今日亦相當英俊，仲訂咗一間會員制嘅餐廳同阿花食飯。阿花受寵若驚，因為餐飯相當有情調，而且仲好似幾貴咁。
食完飯，兩個人就開始講當年，而呢個時候阿花先知道一個驚人秘密，原來馬仔早半年前就已經結咗婚。
「我都唔知你結咗婚。」
「結唔結都係咁，我好自由呀仲。」
「你老婆唔理你架咩。」
「我同佢感情唔係幾好。」
唔知點解，所有已婚男人單獨同一個條件唔錯嘅女人相處時，都總會同老婆感情「唔係幾好」。
「結婚半年就唔好？」
「係呀，所以我喺出面都有玩。」
「都有玩」呢三個字對阿花嚟講就真係太迷茫，佢望住馬仔，不禁發出一個求答案嘅眼神。
「我有幾個sex partners。」馬仔邊講，邊向阿花打眼色。
Partner後面都仲識加個s，果然去得呢類會員制地方嘅都係受過高等教育，不過阿花聽到之後就一臉尷尬。
起初佢以為今次係一個機會；
起初佢會覺得大家會執返一啲以前無咗嘅姻緣；
起初佢會以為今晚係浪漫而且快樂；
起初佢以為馬仔係一個好男人。
但統統都唔係，馬仔呢一種接近係動物求交配嘅相處速度，令阿花本來嘅想像一掃就冧哂，佢真係完全唔習慣呢一種交手形式。但正所謂好頭好尾，無理由拂袖而去，話晒呢餐飯都好似幾貴，不如食埋先啦。
「要拆開一段男女關係我唔怕，但涉及婚姻嘅我就唔願意。」
「well」馬仔知情識趣，亦無再纏擾落去。
一餐晚飯完成，馬仔仲帶咗阿花去一間唔錯嘅酒吧，大家規矩咁飲咗一杯酒就各自返屋企。
阿花有失望，但其實佢自己都唔知點解有希望。現代感情根本就係與方便掛勾，上網速度有幾快，戀愛速度就可以有幾快。轉彎抹角只會顯得你又蠢又慢，直入中路嘅方法，先係呢個世代嘅皇道呀。
薛可正Facebook Page
http://www.facebook.com/sithoching