男人的Fantasy (一零三）今晚食飯，著靚啲
圖片來源：互聯網
做男人嘅，多數都會將生活上嘅注意力放喺工作度。宜家搵食艱難，除咗一個星期嗰一兩場英超同耐唔耐同班老死打吓FIFA，生活上好似已經無咩好細味嘅地方。
每日擦完牙就半合眼咁摸住路行去巴士站，返到公司死做爛做，午飯時間點都要偷半個鐘嚟補一補眠，然後就係收工趕返屋企，搞吓未做完嘅工作，換吓燈膽睇吓電視之類又到半夜。
有時靜落嚟，都唔知係我哋追生活，定係個生活一直追住我哋。總係覺得匆匆忙忙，心情唔好時仲會有白活一場嘅感覺。
「喂，聽晚去飲阿龍嗰餐喎。」
唔係阿文打電話俾我，我都唔記得咗好朋友聽日結婚。我喺衣櫃入面拎嗰套已經封晒麈嘅西裝出嚟，望兩望都係覺得著普通少少算，就著返平時返工嘅衫咪算囉，主角又唔係我。
「提提你呀，阿龍話有咁靚著咁靚，送佢上路喎。」
就係阿文嘅呢個電話，我都係決定抹抹套西裝，做我聽晚嘅戰衣。
其實我哋係一大班老同學，二十幾年嗰一種。呢十幾年，大家各有各忙，話就話宜家有網絡，要搵返以前嘅人唔難，但好多時都唔會齊人。今晚阿龍結婚，係二十幾年嚟最齊人嘅一次。我著住我套戰衣，暫時忘記工作，仲有我每日追住嘅生活，去舒舒服服咁食一餐飯。
大家都變晒樣，阿麗就肥咗，咁都啱…生咗成四個。
小燕就仲唔係幾好，咁緊係啦三十幾歲都未嫁，唔KEEP下就真係等堆填。
阿章以前讀書唔成，估唔到宜家會做老闆。
我哋盡情咁玩，盡情咁笑。我飲咗好多酒，突然間我望住塊鏡，覺得好唔一樣。同平時朝早追巴士時，我喺樓下麵包舖塊鏡睇嘅我完全係另一個人嚟，原來我咁著都幾靚仔…有少少似…當年畢業時嘅我一樣。
我再望返一班老同學，每一個嘅笑容都回復返細個時一樣嘅純粹。我哋咁多年見面，都好似無見過大家笑得咁開心，無論我哋有幾多錢，升職升到幾高，股票又賺咗幾多錢都好，我到呢一刻先知道，我哋要嘅係乜嘢。
我哋要嘅，只不過生活入面一個驛站。行到辛苦時，就換個自己抖抖。
同自己講一句：
「今晚食飯，著靚啲。」
薛可正Facebook Page
http://www.facebook.com/sithoching