圖片來源：互聯網
 
最近好多老友結婚，不過大部份都唔係結得好開心。
 
洗一大舊錢就唔在講，一個屬於自己嘅婚禮，但要服侍幾百個人嘅諗法，兩位主角嘅雙親滿唔滿意地方啦、地點夠唔夠就腳方唔方便班朋友嚟啦、啲酒席好唔好味啦、回禮禮物夠唔夠體面啦、喂點解你有魚翅我唔食呀等等等等嘅問題，每一個都係你同另一半可能會開戰嘅題目。
 
我成日覺得兩個人搞婚禮就好似搞生意咁，一檔生意開嚟幾百個問題，其實根本唔使每個問題都拎出嚟傾。
 
回禮禮物係糖定朱古力？一個人決定；
金都定係老尖做西裝？一個人決定；
要唔要環保宴？一個人決定；
去邊度渡蜜月，最好都係一個人決定。
 
其實你哋知唔知，「商量」真正嘅意義係咩？就係睇吓兩個人入面邊一個惡啲，另一個人要聽佢話。所以呢個世界真正要商量嘅事唔係有好多，更多嘅係大家點樣都維持呢一段關係。
 
不過又有好多女人唔湊米氣，個老公乜都俾佢話哂事，又話人地冇主見。食餐飯又係咁，擺餐酒都係咁。平時行出街食飯又要懶民主：「你想食咩呀？」
 
我哋男人想？食平嘢妳又西面，食貴嘢我個銀包又出血。妳問我心入面嗰句，我就直情話：「我想返屋企煮兩個麵，食完同朋友打FIFA打到今晚三點再瞓。」但係得唔得丫？唔得丫嘛，咪又係死死地氣最後陪住妳呢個假民主嘅暴君唔係打邊爐就食日本嘢。
 
所以妳哋啲女人，要珍惜一個乜都俾妳話事嘅男人。佢哋唔係唔理事，佢哋自己都有要求，只不過喺自己要求同大家感情之間，佢揀咗維繫大家嘅感情，寧願將個話事權交出嚟，都想妳開開心心。
 
識做啲啦女人。
 
薛可正Facebook Page
http://www.facebook.com/sithoching

Uncategorized 個回應 | 4,741 個已瀏覽 |