男人的Fantasy (一零五）面具
圖片來源：互聯網
「喂，飲啦陳生。」
阿龍拎住個酒杯，喺夜總會嘅包房入面好似穿花蝴蝶一樣，同在場每一個老闆級嘅人物敬酒。阿龍係一間外資公司嘅經理，眼前呢一班有錢人，任何一個都隨時有可能俾到幾百萬甚至係幾千萬生意佢。
「我上個月買咗架大牛，都唔好揸嘅，俾咗我個仔拎去玩。」
「最近個市唔錯，我上兩個月先買咗兩間屋，好平好平，億三都唔使。」
「我聽朝飛喇，去韓國傾個演唱會，投兩千萬試試囉。」
阿龍坐喺旁邊，聽住一班上流社會嘅老闆傾呢類「家常便飯」，突然間收到老婆嘅WhatsApp：
「今晚記得拎錢俾我，阿女學校要交三千幾蚊。」
「嗯，知道。」
阿龍將電話放返好，再擠一個笑臉出嚟盡快投入現場嘅氣氛，但聽住老闆們嘅閒話同時，佢一路諗緊自己戶口仲淨返幾多錢？
一萬二千蚊，阿龍嘅戶口就只係得返一萬二千蚊。
阿龍大學會計畢業，入過大行做一個會計師，但最後覺得太悶所以放棄。嚟到呢間公司捱到一個管理級，阿龍就係因為呢間公司可以俾佢接觸唔同嘅老闆，見識多自然就機會多。但無論阿龍點捱，佢一直都只係一個小經理，每日盤旋一班有錢人身邊，令到佢愈來愈無自信。
人哋一開口就係幾千萬，點解我個袋只得幾百蚊，仲要擔心月尾唔夠錢俾屋企開支？仲要就算幾辛苦都好，行到出嚟望住呢班老闆，都仲要扮一個撈得好掂嘅外表，所有話題都要跟得上，所有表情都要咁自然。
阿龍呢一晚飲得愈來愈多，最後半醉咁返到屋企。
「老公，你拎咗錢俾我未？」
「嗯，喺枱頭。」
「你做咩飲到咁醉？應酬係咪好辛苦？」
「唔辛苦。」
「點解飲咁多？講俾我聽。」
阿龍望住太太，呆望咗一分鐘，最後都係垂低頭：
「我唔識講。」
太太望住阿龍入房嘅憔悴背影，將笑容收起坐喺廳中間，唔知可以比咩表情比呢一刻嘅自己。
薛可正Facebook Page
http://www.facebook.com/sithoching