男人的Fantasy (一零七）最難開口的事
圖片來源：互聯網
「BB，我今日想食德國豬手。」
「德國豬手呀？好呀…好呀，咁妳想去邊度食？」
「銅鑼灣有間呀，我哋去嗰度食呀。」
「好呀我上網睇睇訂位資料先。」
聽到女朋友小靈嘅要求，拍拖都無三個月嘅我當然快手快腳咁上網睇訂位資料啦。但一打開個網頁，我就俾入面一句嘢嚇到爭啲跌手機。
每人基本消費500~700
咩話？食豬手都要成五百幾蚊一個？隻豬生前識講嘢呀？
今日十八號，仲有兩個星期先出糧嘅我，戶口只係得返四千幾蚊。就算係講緊兩個星期後出糧，其實我人工都只不過係萬四蚊，今晚呢餐飯分分鐘係我十份一嘅人工。不過小靈平時都無咩要求食咁貴嘅嘢，再講呀，貴唔貴其實只係睇我自己嘅能力之嘛。
喺我一路扮打訂位電話嘅呢一分鐘入面，我個腦就好似有天使同魔鬼一路同我人仗咁。
「千四蚊喎，夠去台灣機票喇。」
「千四蚊咋，咁都唔去你點做人男朋友呀？」
最後魔鬼都係略略打嬴咗，我有三秒時間諗點樣扮訂唔位時，小靈就已經同我講：
「我上網book咗喇，行啦。」
「哦…」
就係咁，我就懷住一個「背脊骨落」嘅心情去到呢間啲豬識講嘢嘅德國豬手餐廳，一打開個餐牌，我………頂你個肺，一客豬手要398蚊，我望望隔離枱個份量好似仲唔係好多。再睇睇其他食物，意粉都要198蚊一個，德國餐廳嘅意大利粉咪即係喺日本食部隊鍋，又唔係正宗嘅你憑咩收咁貴呀？
「我唔係好肚餓，妳叫丫，我分妳少少食。」
樣衰都要做一次，呢餐我自己點都唔叫嘢食，減低返個成本，最多返屋企食出前一丁。
「唔好啦，陪我食啦。」
就係咁，小靈叫到一枱都係。食嘅時候我條脷無哂知覺，因為腦入面一路都有一堆三位數字喺度互相疊加緊。
埋單時一睇，果然，1298蚊。
我笑一笑咁放低我本來打算買game嘅兩張五百蚊同三張一百蚊，然後好型咁講一句：「唔使找喇。」
小靈拖住我隻手跳吓跳吓好開心咁行，一路同我講原來佢想食呢間餐廳好耐，之前有個朋友約佢佢都無去。聽到呢度其實我係開心，因為世界上總有好多事，係金錢衡量唔到。
雖然「我無錢呀」真係好難講出口，但其實又唔係咩大不了嘅事，使大咗咪下次去食譚仔囉。送咗小靈返屋企，我收到佢消息。
「袋好啲錢呀，今餐太貴喇，我出少少啦。」
我摸摸衫袋，先發覺小靈唔知幾時放咗一百蚊落我衫袋入面。我真係好感動，完全明白咁多年嚟睇東華時成日聽到嘅「多多益善小小無拘」嘅真正意思。
心意，有時比世界上所有事都重要。
薛可正Facebook Page
http://www.facebook.com/sithoching