圖片：By Elkin
 
志明今年三十四歲，離婚剛剛好四個月。
 
離婚後嘅生活，志明仍然唔慣。不過每日晨日晚歸嘅工作日子，總算可以俾佢一個空間去透氣。有好多事唔使提起，有好多事唔使思考。
 
有一日佢放工之後，經過尖東海邊，望住已經慢慢疏落嘅聖誕燈飾，志明突然諗返，咁多年嚟嘅聖誕係點過。
 
十幾歲時啱啱可以出街玩，曾經有唔知幾多年，每個聖誕都係同一班朋友過。到拍拖之後，就係同女朋友過。女朋友後來變成老婆，除咗頭一兩年仲有出去食飯之外，兩個人後來慢慢變得無心思，好多嘅聖誕都喺工作入面過就算。
 
志明嘅婚姻就好似好多嘅故事咁，由濃轉淡，由盛變衰，最後離婚收場。曾經有一段日子志明以為自己一生就係咁過；曾經有一段日子志明覺得自己唔會再需要節日。
 
離婚後嘅日子，志明基本上要學識重新照顧自己。一件衫一條褲都要自己洗，每一隻食完杯麵嘅叉都要自己親手丟。佢由開頭唔慣，去到慢慢明白，呢個就係佢選擇後嘅自由。
 
直到見到尖東燈飾前，志明都覺得自己係感覺良好。
 
每一個聖誕，就好似一個印記咁。我哋每一個印記裡面都有唔同嘅回憶，可能係同一班人，又可能係每一年都唔同。但最重要係，每到聖誕，我哋都會重搜一次每個印記嘅可愛之處，呢堆回憶就好似話俾我哋知，無論我哋生活有幾麻木幾咁無顏色都好，有一啲事都曾經發生過喺我哋生命入面。
 
諗到呢度，志明覺得好失落，因為佢唔知道今年，2016年嘅印記入面，佢會同乜嘢人一齊去過。
 
望住燈飾上面大大嘅四個大字，志明苦笑一下，然後細細聲同自己預祝一句：「聖誕快樂」
 
薛可正Facebook Page
http://www.facebook.com/sithoching

Uncategorized 個回應 | 4,290 個已瀏覽 |