男人的Fantasy (一零九）由甜到苦
畫作：阿虫
細細個時，有「維他奶王子」綽號嘅我，去到邊度都會拎住一支維他奶。無論係踢完波、冬天凍到震時、一班朋友出去食飯，呢個習慣都幾乎無咩點改變過。阿媽成日鬧我：「咁鬼鍾意飲甜嘢，老來你就知味道。」我就覺得甜味咁好，又易入口又唔會有反胃感覺，唔通我鍾意飲酒好呀、又澀又辛苦。
到慢慢長大，我開始聽到身邊有朋友講：「我唔鍾意甜味，好辛苦。」由一個人講，到兩個三個……四個，最後身邊同年紀朋友，已經無咩人好似我咁，鍾意飲甜味。佢哋鍾意飲酒，而且比起我飲維他奶仲要飲得多飲得盡慶。
「奶都好飲嘅，仲細呀？」我聽過呢句說話好多次，但我心諗我又唔係用奶樽飲，關年紀大年紀細咩事，原來，我從來唔知道呢種係一種幸福嚟。
當一個人開始經歷人生高低時，原來會有一種不知不覺間嘅變化。動作會開始減慢，對生活所有事都會慢慢變得沉默。以往飲住甜味心情愉快嘅自己，唔知幾時開始愈來愈遠，漸漸變成一個好多煩惱，好需要麻醉嘅人。
飲完甜味只會愈來愈清醒，愈來愈感覺到生活上種種。唯一嘗試過一次宿醉之後，先發覺原來酒精係咁可愛。可愛嘅層面上唔再係計較入口甘苦定甜，而係可以幫助暫時遠離煩惱。
我所講自己從來唔知道咩係幸福，係原來煩惱一直離我好遠，雖然最後佢都係嚟到我生活入面。自此之後，我好明白每日都飲酒嘅人，但同時我又好抗拒自己同化成為佢哋同一類人。生活入面甜酸苦辣本來就係應有盡有，既然甜味我哋可以細嚐，咁點解苦澀我哋唔可以當係一個經歷？
每日麻醉自己，最後只會逃避到苦澀佔據我哋大部份嘅生活。就好似打擂台咁，對方一個右勾拳如果係來勢洶洶的話，咪避一避佢，搵個位再出拳，你一定可以將面前嘅事解決。
薛可正Facebook Page
http://www.facebook.com/sithoching