資料圖片出處：Yosola Olorunshola
CITIZENSHIP＿10 quotes about tolerance for International Day of Tolerance
 
後生時，心口一個勇字，遇到乜嘢事都好，都用自己第一個官感出發。唔理你件事係黑定白都好，我想講咩我就講咩。
 
本住呢個「是其是、非其非」嘅方向，我唔可以話自己撞過好大嘅板，只係年紀大，慢慢知道一件事，其實牽涉好多人事。
 
第一個官感代表對自己嘅小小交代，但對件事係咪真係好？我唔敢肯定，亦唔敢放棄呢個考量。
 
曾經有個朋友A要開一間公司，搵咗朋友B幫忙。朋友B用盡全力，幫A墊支咗好大筆錢去做前期工作，最後大家先知，朋友A根本無足夠嘅錢去做呢件事。
 
一班朋友晴天霹靂，第一時間擔心朋友B無論身心嘅狀況。我問朋友B:
 
「你同A冇計傾啦肯定？」
「點解呀？」
「佢明明無錢都叫你幫手，你唔嬲咩？」
「嬲，點會唔嬲？」
「咁咪係囉，以後仲會見咩？」
「我梗係見佢啦，我搏佢搵到老闆，下次連本帶利俾返我。」
 
正當我佩服B嘅宏觀時，佢再講多句：「嬲有咩用？啲錢會出返嚟咩？」
 
我當時恨不得即時拎紙筆抄低呢句說話，就係呢句說話，令我對「第一官感」於處事上嘅用途從新考量。
 
人到咗一個年紀，處事待人都要宏觀。你執住一個道理或者脾氣死磨爛磨，唔一定代表呢個態度可行。
 
目標為本，所有事都係用「結果」去說道理。
 
薛可正Facebook Page
http://www.facebook.com/sithoching

Uncategorized 個回應 | 5,391 個已瀏覽 |