男人的Fantasy (一一一)我的新年
Photo From Sini Kaki
就嚟到新年，已經過咗好鍾意逗利是年紀嘅我，慢慢咁對呢個節目無咗感覺。
細個過新年，一早諗定初一要去阿爺嗰邊，初二就會去阿公嗰邊。之後更新下近呢一年啲舅父姑姐表哥堂姐有冇結婚，我今年嘅利是會唔會有加薪。初三阿媽話係赤口，全日都唔會拜年，咁呢日多數我都會搵班兄弟出嚟賭錢，冇錯，係賭初一二逗返嚟嘅錢。初十五先拆利是呢啲咁封建嘅思想我從來都無跟隨過，錢就好似食物一樣，趁佢熱嗰時食用就係最快樂。
之後初四開始又會去逗，一日逗就一日賭，時間同金錢就「這樣慢慢的飄走」。我二十歲前每一年生日都係咁過，每一年都好快樂。
不過，到後來慢慢成長，我哋每一個表兄弟姐妹都大個晒，出席嘅人開始唔齊。表哥同表姐會因為嘈交而唔想見到大家，其中一個會缺席幾年。會有新成員出世，亦都會有長輩過身。細細個好開心嘅新年畫面，慢慢好似砌圖咁一塊一塊甩落嚟。
細個時我好鍾意去阿爺屋企，每到新年就會睇到爸爸同幾個姑姐大戰四方城。雖然話係兄弟姐妹，但係佢哋一落場就唔係講笑，上落大到可以係當時好多人一個月嘅人工嚟。我爸爸打牌好叻，仲要係打花章。花章就係佢唔使執好啲牌，就咁放到亂七八糟，佢都可以好快知道自己求咩牌同點打。
細個睇佢哋打牌真係好刺激，有時唔知點解爸爸會突然開牌，原來已經食咗糊。佢從來無教我，但佢過身之後我自己試過學佢，最後食過一次詐糊嘅我好快就放棄咗，但呢個回憶喺我心入面一路都有記住。
阿爺離開差唔多十八年，嫲嫲亦已經九十歲。新年俾我嘅回憶，慢慢已經由開心變成無感覺。無感覺係故意，因為當好多事件已過境遷時，無味道總好過係苦味。
新年快樂。
薛可正Facebook Page
http://www.facebook.com/sithoching