男人的Fantasy (一一二)朋友妻龍虎榜
網上資料圖片
男人之間，有好多話題可以傾，靚車買樓索女賭錢踢波統統都可以傾，但朋友個老婆靚唔靚，你哋敢唔敢打開天窗說亮話咁去一齊傾？
利申先，我本人係有一個「朋友妻龍虎榜」，目的係要坦然咁表揚一眾為自己外表努力不懈，為呢個世界不斷增加美感嘅阿嫂。每一次喺Facebook見到龍虎榜入面嘅阿嫂放相，我都主動咁讚好一下，甚至會留言當住佢老公面講一句：
「使唔使咁靚呀嫂？」
學嘢喇，君子之交嘅讚美，就係咁恰當。
試問阿嫂放得張相上公眾平台，點會無準備俾其他人見到。但如果你見到又唔敢讚，呢個行為就係人類嘅陰暗面，你怕其他人誤會，你怕其他人嘅閒言閒語。正所謂清者就自清，所以當住佢老公，即係你老死面前去讚，係天下間最美好嘅一件事。
有時我都嫌唔夠，仲會去WhatsApp group度喺一班朋友面前向老死補多句：
「嘩，你老婆今日好靚呀。」
做得老死好多都識於微時，即係佢未溝佢老婆時你哋已經識，亦即係話好多人喺溝緊自己老婆時已經會拎住未係老婆嘅老婆嗰張相去同老死講：
「我想溝呢條女，正唔正？」
一班老死向住一個未係阿嫂嘅阿嫂，有咩法子唔大J特J，所以建基於呢個情況底下，偽善唔係我哋要做嘅事，我哋要做嘅事，係要向阿嫂保持尊重，而又繼續欣賞。
從來老婆同兄弟都好似貓同狗咁，對立係正常，打交就好普遍，和平相處唔係無，小啲囉。所以呢個主動而不落俗套嘅龍虎榜嘉許基制，一直都幫我同唔同嘅阿嫂打好關係。試問佢又點會唔歡迎一個成日喺Facebook讚佢嘅老公朋友？呢啲咁好嘅朋友佢點會捨得老公唔搵？
要有融洽嘅關係，永遠都要搵個最好嘅方法去建立。唔表達就代表多問號，多問號就是係多猜疑。搞掂同啲阿嫂嘅關係，以後同老死睇波踢波，就容易好多啦傻豬。
薛可正Facebook Page
http://www.facebook.com/sithoching