圖片：IMAGE CACHE
 
最近同一班老死約埋，玩一隻手機上面嘅遊戲。唔玩尤自可，一玩個個工都唔返咁滯。有啲就返工去廁所扮屙屎玩，有啲就請大假喺屋企玩，有啲直情坐車返工都要玩。
 
當我哋以為無人阻止到我哋五個一隊衝鋒殺敵時，真正嘅敵人就出現喇。
 
「我玩到八點咋。」
「點解呀？」
「我女朋友返嚟。」
「咁又點呀？」
「唔好啦，佢會鬧。」
 
咩話？
 
「頭先我女朋友串我。」
「串你咩？」
「串我打機唔陪佢。」
「如果你唔打機會點陪佢？」
「咪喺佢隔離睇電視囉。」
「咁你打機時會匿埋喺廁所咩？」
「唔係呀，咪一樣喺佢隔離。」
「咪係囉!!!!有咩分別呀？」
 
廢物!!!!
 
我一直都唔明，女朋友呢個物體點解會唔同意男朋友打機。點解一定要女權到個男人一直喺妳身邊，妳都仲要操控佢哋官能上嘅選擇呢？一個男人，選擇喺妳面前，拎住個手掣同班老死玩得歡天喜地。
 
無酒飲!
無煙食!
無女溝!
 
最重要係唔使用錢，唔好同我講買部機要錢，照咁講你瞓緊覺都開機風扇用緊電，咁不如妳直接瞓街啦。講返正題，自古都有云咩叫好仔？唔嫖唔賭唔毒唔打女人，妳條仔依家只係打吓機，妳都仲要全方位多角度咁去留難佢，到底妳有冇諗過點去經營一段感情呀？妳哋淘寶上網睇衫時唔見我哋男人阻止妳哋？
 
萬惡嘅女人呀，進化啦唔該，唔好再以為當啲男人狗咁喝，叫佢行東唔敢行西嚟滿足妳哋嘅操控慾啦，做返一個正常嘅女人，去俾一個溫暖嘅感覺佢哋，等男人知道妳哋係錫佢，會俾最小嘅空間佢去同朋友打吓機，點都好過坐監丫。
 
男人點都會玩，唔喺屋企打機，就去出面搵第二啲機打，妳哋班女人自己諗過呀。
 
薛可正Facebook Page
http://www.facebook.com/sithoching

Uncategorized 個回應 | 16,243 個已瀏覽 |