網上資料圖片
 
好多男人，仲喺後生嗰時都唔係好鍾意食團年飯。一餐要喺年三十晚呢個放假前席食嘅飯，點會夠同朋友出去飲酒溝女咁好玩？所以好多男仔細個就俾阿爸阿媽捉住食，到青春期就借啲意唔食，跟住到出嚟變咗男人，就拎正牌想唔食就唔食。
 
我知好多人睇到呢度就叻叻咁：「喂，我唔係咁喎，我好孝順年年陪阿媽呀。」
知喇知喇，我話大部份咋孝子。
 
好多人都唔明白團年飯，應該係話未到時間了解團年飯。呢個道理其實好簡單，就好似你要自己個仔出世，先知道自己以前激你阿爸阿媽，佢哋係有幾心痛。
 
我後生嗰時，即係早幾年呀，都成日唔想食團年飯。我覺得食飯之嘛，姨媽姑姐之嘛，要幾時見就可以幾時見啦，我大把時間見佢哋。等我做埋呢樣嘢陪埋邊個人睇埋邊套戲去埋邊個國家再慢慢食，反正年年都有得食，係咪先？
 
合理到不得了，咁我真係有好多時間喎。只不過我從來無諗過，同我同枱食飯嘅，唔一定夠我有咁多時間。
 
後來時間慢慢過，我見到有長輩離席，佢呢種離席唔係離開張食飯枱，而係離開呢個世界。有親人遠走其他地方，有啲可能反目，你會慢慢發現，雖然後來出世嘅家族成員一路增加，但自己望見呢個屋企嘅感覺會愈來愈少。
 
呢個時間我哋亦會發現，細個無憂無慮嘅一餐團年，原來已經唔再係同一餐飯。我哋見識過工作嘅煩惱，生活嘅壓力，細個從來唔使問枱上面嘅團年飯其實要幾多錢，但而家會望住條魚一路諗：「呢條星斑應該都幾貴，一陣要唔要夾多兩百蚊？」
 
我哋認清呢個世界嘅同時，先知道我哋嚟呢個世界時嘅原點喺邊度。諗下依家忙碌嘅生活，可能係透唔到氣嘅氛圍，你就會知道，團年飯俾到我哋嘅，到底係乜嘢。
 
薛可正Facebook Page
http://www.facebook.com/sithoching

Uncategorized 個回應 | 4,170 個已瀏覽 |