男人的Fantasy (一一五)愛情浪子
網上資料圖片
喺愛情路上，我一直都係一個浪子。
呢句說話嚴格嚟講係「語言偽術」嘅一個入門，所謂「浪子」，即係唔會受到任何嘅牽絆，隨住自己嘅所想，想做咩就做咩。
簡單少少講，咪即係一個不負責任嘅仆街囉。唔中意妳，呼之則來，無嘢就叫妳過主，呢啲人只會係唔愛妳，而唔係身不由己。
喺一個需要負責任嘅關係入面同人哋講「我係唔會負責任」，咁同行入餐廳食飯之後同人講唔會俾錢有咩分別？我可以讚你夠薑講，但夠薑並唔等如啱，所以愛情浪子呢個論述，一直喺我心目中都係一個仆街嘅講法嚟。
可惜，「男人愈仆，女人愈愛」。
基於「摸唔到又得唔到就是最好」呢個千古不變嘅愛情定律，好多女人真係會信呢個咁弱智嘅講法，佢哋會放低身段，去追逐呢個浪子，希望佢可以回頭，為自己留低一個答案，又或者係一點眷戀。
計我話呢啲女人都白痴，成壇嘢已經同妳講得好清楚啦。留唔住嘅先叫浪子，捉唔到嘅先叫浪子，咁俾妳捉到又留到嘅，咁佢就已經唔係浪子。佢只會變成一個普通「男子」，再望耐多少少，分分鐘只會變一個「傻子」。
上帝創造人用咗七日，我肯定有三日以上嘅時間用咗嚟設定呢個愛情基制。控制人一生只需要兩樣嘢就足夠，宗教同愛情。宗教就未必個個有，但愛情就肯定會個個擁有過，喂喂喂，唔好喺電腦前面笑到叻叻咁同我講：「毒L咪無愛情囉。」毒L都可以有愛情嘅，就算佢愛上一個攬枕，呢一份都可以叫愛情，唔好笑人。
宗教可以令人經營一生，同樣愛情都可以令人意亂一時，三幾十年嘅事我哋真係預唔到，不過眼前一時三刻嘅感覺，其實我哋自己真係需要好好控制。唔好因為一時嘅感覺，而俾一啲根本一聽就知係騙局嘅巧取豪奪令自己身陷愛情險境，唔好愛上浪子，因為呢個世界只有騙子。
薛可正Facebook Page
http://www.facebook.com/sithoching