男人的Fantasy (一一六)男人認錯
網上資料圖片
連我自己都懷疑，我可唔可以真心真意咁講「男人認錯」呢個題材。所以喺寫呢個題材前，我用十五分鐘去諗我自己有冇認過錯。
「我有冇認過錯？」呢句說話係咪好難諗？點解呀，因為有時我哋男人都唔知自己嘅認錯係咪真係真心認錯。男人天生嘅敵人同愛人都係女人，而女人亦同時係一樣需要身邊人不斷認錯同埋認同嘅生物，男人嘅認錯係有層次，當中係包含住愛、體諒、包容、讓步同廢事嘈。
好多人話，男人認錯係一種權宜，與其咁講不如話男人認錯係一種技能，而喺兩個人嘅相處入面，呢種技能係必備。當女人唔知自己想食咩國家嘅菜時，你幫唔到佢諗，係男人你錯；當女人話自己姨媽到好痛好辛苦時，你唔知點樣可以令到佢唔痛，係男人你錯；當女人心血來潮想搵交鬧時，扮離開去維繫大家感情時，你睇唔穿佢口是心非，亦係男人你嘅錯。
做咗幾十年男人，亦都對咗女人幾十年，男人對「認錯」呢個概念，慢慢變成另一樣嘢。如果係咁講嘅話，我哋男人仲點可以搵得返真正認錯嘅奧義？如果我哋真係有錯同時又真係知錯時，我哋應該點樣可以認錯？
最近，我遇上一件事，一件醉酒之後嘅錯事。我無唔覺意淫人妻女，亦無將一個仇人分屍，我只係向一個好信任我嘅人，講咗一啲好衝動嘅說話。酒醒過後，我記得自己所講所做嘅一切，亦知道我打中咗對方一直虛掩住嘅痛處。
俾著平時嘅我，已經即時打電話用我把不死不休嘅口，去氹返我呢個咁重要嘅人。但我無咁做，因為我知道自己講再多都係無用，我係真真正正做錯一件事。我收起自己平時一貫套路，只係安安靜靜咁用幾日時間去反省。以前嘅我其實連反省都係一樣做俾人睇嘅套路嚟，但今次我只係靜靜咁俾時間大家。
到最後都係想講，我真係做錯咗。
原來咁多年嚟，認錯認到神級嘅男人如我，到真正遇上自己犯錯時，係完全無方法無頭緒。就好似一個小朋友咁坐喺地下，等候發落，但又覺得無所謂。因為再大嘅懲罰，都唔夠自己發現自己真係做錯又後悔時，來得震撼。
男人犯錯，男人認錯。
薛可正Facebook Page
http://www.facebook.com/sithoching