男人的Fantasy (一一七)應酬好玩
網上資料圖片
老公因為去應酬，凌晨四點返到屋企，入門口一睇，老婆已經坐喺沙發等佢。
老婆：「玩得好開心啦，訊息都無覆我。」
老公：「老闆飲到好醉，仲發脾氣見人就鬧，我睇住佢。」
老婆：「次次去夜總會應酬，都講到好慘咁。」
老公：「點解妳覺得好玩？」
對於呢兩個千年嘅夫妻問題，一直都無人答得到：
「去夜總會玩點解唔開心？」
「去夜總會應酬點解會唔開心？」
女人們，我試吓用文字帶妳哋去一次。
跟得老闆去夜總會應酬，成晚張單無兩萬都有萬八，即係話我哋將會見到嘅，係一個好有潛質嘅客人，亦即係話，今晚身為手下嘅妳，要打醒十二分精神，唔可以有咩出錯，得失呢個客人。
喺一個花天酒地嘅地方，有靚女有靚酒，但妳只可以專心滿足坐妳對面位客人嘅所有需要，咁同叫妳哋行入Gucci只係可以望住啲衣架有咩分別？
好喇，客人嚟到大家坐低，妳老闆例牌扮吓老友，搵媽咪叫啲靚女入嚟揀下。一眾佳麗入場，咁又老實講句，妳老公成日呃妳話啲女好醜樣係假嘅，現實係點都有返兩三件北方佳麗係唔錯嘅。
不過想提提妳，呢啲靚女一般坐埋妳身邊玩三兩個鐘頭嘅收費，可以係港幣二千蚊左右，妳真係以為妳老闆好想妳無啦啦使佢兩千銀再搵條女分散妳注意力，令妳湊唔到個客？
唔使諗喇，擰頭啦擰頭啦，扮到妳只係鍾意會揀林志玲咁嘅女，如果唔係就唔要。妳仲要交吓戲，陪個客一齊好咸濕咁揀女，直情沙圈睇馬咁教埋佢睇，跟住自己又好唔滿意咁一個都唔揀。老闆會覺得妳做得好，將個經濟效益自動調較到最高水平，同時個客又開心。
跟住老闆會開始同個客傾生意，呢個時間佢哋一定會開一支酒。咩酒妳唔使擔心，總之一定唔會係Jolly Sandy。唔係日本嘅響，就係馬仔，未飲過嘅妳就諗下妳平時同班八婆朋友去唱K，將啲黑牌唔撈綠茶咁倒落個杯，加幾粒冰就倒入口，妳就知道妳老公平時喺夜總會係飲咩。飲嘅節奏唔係好似妳哋去玩咁，少少咁飲。係講緊無啦啦又大叫飲杯，個客講兩個爛gag，妳老闆扮笑扮到好開心時又大叫飲杯，但同時妳要一路記低佢哋講咩，仲有老闆有冇講錯嘢，個客眉頭眼額有咩唔正常表情咁。
妳一直都喺度工作，喺一個耍樂嘅地方，妳一直都喺度工作。
有時好彩老闆會扮豪氣，叫妳搵個靚女小姐坐喺度，一人一個女仔陪，幾有型。著住低胸嘅北方小姐，坐妳隔離其實咩都唔會做，佢哋嘅目的係坐落張枱度，賺妳嘅錢但最好就唔使飲。所以佢哋會一路同妳傾計，搵嘢同妳講，呢個情況係好正常，因為人哋都係人，無人想好似個奴隸咁服侍妳。大家萍水相逢，妳要個小姐，佢要一枱鐘，就係咁簡單。
咁當然，有啲天生係煩嘅小姐係會不停煩妳，但唔使諗喇，大庭廣眾妳最多可以食吓波餅，其他嘅嘢妳諗都唔使諗，妳眼前仲有個客要湊。某程度上，多一個女仔坐隔離係辛苦多一種，同細個考試前溫書，妳無啦啦開著部遊戲機一路聽住啲聲去溫一樣，搵著自己嚟搞。
就喺呢個環境之下，妳一路保持高集中嘅狀態，一路面對客人一次又一次乾杯、老闆喜怒不形於色嘅表達、身邊位小姐無啦啦問妳咩叫越位嘅煩躁、仲有另一半不斷喺訊息度問妳幾點返屋企。
其實妳知道呢類酒局係無意義，就算傾得成生意，啲錢都唔會直接入妳袋，只有啲酒會直接落妳個胃。做得好係應該，做唔好係能力不足。辛辛苦苦一晚之後，客人走咗，老闆攬住個小姐有下場，妳就喺尖東周圍搵邊度有返屋企嘅通宵巴士。
成程車妳個頭痛到想爆開，唔想打開電話睇，唔想覆任何人。返到屋企，另一半再質問妳，妳已經一句說話都唔想講，因為已經係半夜，聽朝仲要返九點開會。
應酬好玩？好玩就唔會係應酬啦天才。
薛可正Facebook Page
http://www.facebook.com/sithoching