男人的Fantasy (一一八)合理偷食
From Andrew G Marshall
阿康係我兄弟，今晚嚟咗我屋企瞓，因為佢偷食件舊菜俾佢老婆發現，趕咗佢出門口兼要同佢離婚，呢次已經係第三次。
「康哥，你有冇咁蠢呀？已經衰第三次，到底你真係死性不改，定係你真係咁唔鍾意你老婆？」
「我點知會俾人撞到啫。」
「喂，大佬你拖住條女喺灣仔時鐘酒店出嚟呀，有幾難撞到呀？你仲有兩個仔呀，可唔可以定性啲呀？」
「我知俾人見到就唔會玩啦。」
望住阿康講呢句，我驚嘆呢位多年朋友嘅智力同價值觀原來係咁恐怖。
佢老婆叫阿菲，未結婚係一個普通OL，結婚後係一個普通師奶。成世人咩都唔識，只係識對阿康死心塌地。佢對我哋班兄弟一啲都唔好，可以唔打招呼嘅佢都唔會揀打招呼，其實咁都啱，我哋班朋友入面有雞蟲有賭徒有毒男，是但掂一樣都分分鐘陷入萬劫不復之地，阿菲唔鐘意我哋係合情理。
雖然係咁，但過年過節我哋上阿康屋企玩，佢老婆就會用哂全年嘅笑容去招呼我哋，講到尾都係唔想阿康難做。
阿康唔靚仔，搵錢亦唔多。搵二萬五蚊俾一萬五返屋企，跟住一皮嘢就自己慢慢使。佢同阿菲生咗兩個小朋友，距離慢慢愈行愈遠。
第一次我知道佢去偷食俾老婆趕出門口時，佢喊到仆街同我講唔會有下次；我哋成班兄弟輪流收留咗佢足足一個月，阿菲先俾佢返屋企。
第二次偷食被發現，阿康話自己飲醉酒，斷哂片咩都唔知，但佢又識帶人上酒店加俾埋鐘錢，玩完仲要送埋人返屋企先走。如果唔係條女無啦啦喺阿康返到屋企時send msg俾佢，可能阿菲根本唔知道。
嗰一次阿康只係用咗兩星期就返咗屋企，當中唔知用咗咩原因同解釋，我只係知道呢件事之後，我哋見到阿菲，佢都係無表情。
今次第三次，阿康已經無用咩藉口，只係用「唔好彩」去圓自己呢一次出事嘅原因。我成日諗「如果唔係俾人知道就會無事」呢個係咩概念嘅諗法，原來呢個世界咁多錯事，係用人哋唔知我就無錯去解釋得到。
「康，你點解唔離婚？」
「我仲有兩個仔呀。」
「咁你又偷食？」
阿康無應我，只係望住我唔出聲。
「如果你覺得同阿菲走唔到落去，你就同佢離婚。兩個仔唔會因為無咗你呢個不斷侮辱佢阿媽嘅老豆，而變得有太大分別。人有時係咪唔好咩都諗自己，公平少少對自己身邊人會好啲？」
「我無唔理屋企，我個個月都……」
「俾萬五蚊返去丫嘛，係你人工嘅六成丫嘛。你講過好多次喇，但咁又點？你第二次出去偷食之後，我見親阿菲佢都抬唔起頭望我哋，唔計你平時出去飲花酒落吓club，剩係偷食已經三次，阿菲仲係日日幫你打理緊個屋企。係咪個女人愈唔出聲，你就覺得自己愈過到骨？」
「我哋都無哂感情，如果唔係一對仔…」
「咁你咪離婚囉仆街，你單身無人理你點玩。」
「但我唔想兩個仔喺單親家庭長大……」
「但你就想兩個仔喺個老母就嚟忍到抑鬱嘅屋企長大？」
呢個世界，好多人都好似阿康咁，可能包括我自己。已經唔相信同唔重視關係，想點就點，只要無俾人知，無俾人拆穿，唔好話偷食，就連殺人都可以。
所有藉口都係廢話，講到底，只係我哋唔夠珍惜身邊嘅人，同相信我哋應該相信嘅關係。
薛可正Facebook Page
http://www.facebook.com/sithoching