男人的Fantasy (一一九)歡樂咭
網上資料圖片
二千年初，香港曾經有過一股「北上潮」。當時好多男人不分老幼，閒時都鍾意一齊返大陸狂歡一吓。
為咗唔想大家用「你朋友就是你」呢啲咁OLD SCHOOL嘅「潮語」去主觀批判我呢篇文，所以我可以用下體發誓，除咗一本十八歲到期嘅回鄉簿外，本人係去到二零零五年先開始拎返回鄉証的。
都唔重要，因為我知你哋唔會信。
話說當年我都有唔少朋友，每個星期都有返大陸玩。當時佢哋形容嘅情形，其實就好似大家睇「一路向西」入面咁差唔多。廉價嘅人肉天堂係佢哋嘅天堂，當時聽唔少邊個女朋友唔俾男朋友返大陸，最後搞到分手都有嘅案例。所以你哋話，人嘅淫念可以有幾大呢。
但以阿柏呢個朋友當年嘅事件，係我哋到宜家都仲津津樂道。話說上個月有一日，我哋一班朋友就去到阿柏嘅新屋玩，失婚嘅佢自己一個住，所以搵我哋一班老死去踩吓場。
當晚大家都飲咗好多酒，我個人一飲得多就周圍走。我喺阿柏新屋行吓行吓之時，就喺佢一堆仲未執好嘅雜物入面，竟然發現七張阿柏嘅回鄉咭。
「嘩，阿柏你有咁多回鄉咭，拎嚟賣呀你？」我拎住堆咭問阿柏。
「拎返嚟啦。」阿柏一手搶走，佢身邊嘅世豪呢個時候突然講：「咁就十幾年喇。」
「咩十幾年呀？」我問佢哋，跟住佢哋就帶我走入一段屬於佢哋嘅回憶入面。
阿柏係我哋一班朋友中最早結婚，二千年初時，係佢新婚無耐嘅日子，但可惜當年佢同世豪兩個，俾一班好鍾意馳騁「三沙一水」嘅壞朋友教壞，好快就沉迷上返大陸呢個玩意。
阿柏老婆叫秋兒，佢管阿柏唔算好嚴，但當年佢就講明，唔俾阿柏上大陸玩。只要唔上大陸玩，就算阿柏玩天光都無問題。
阿柏好愛秋兒，為咗令佢安心，佢將自己嘅回鄉咭交俾秋兒保管。秋兒好安心咁，感受阿柏嘅呢份愛，但佢點都估唔到，呢個只係世豪教阿柏嘅招數嚟。
將回鄉咭交俾秋兒，再去報失申請過另外一張。
就係咁，每個星期六阿柏放工，就會攞住新嘅咭同世豪北上。因為當年已經有香港鈴聲漫遊服務，所以就算秋兒打俾阿柏，阿柏都會話同世豪喺香港玩緊。只要每次天光前返去，秋兒基本上唔會管阿柏。
就係咁，成就咗阿柏同世豪一段咁歡樂嘅時光，佢哋亦將呢張咭，賜名為「歡樂咭」。
但好事永遠人係多磨，而歡樂咭因為方便問題，永遠都要隨身。阿柏好快俾秋兒發現佢申請咗一張新嘅歡樂咭。秋兒乜都無講，阿柏亦狡辯為咗不時之需，總之無捉到阿柏，阿柏就死都唔認。
就係咁，秋兒收一張，阿柏就再申請多一張。上大陸嘅時間，由每個星期六，變成平日請假去玩。最終，要出事都係要出事，就喺秋兒充公阿柏第七張歡樂咭之後三日，秋兒一句說話都無講，就離開咗阿柏。
佢留低咗一盒嘢俾阿柏，入面有戒指、結婚証書，仲有七張歡樂咭。
由嗰日開始，阿柏無再返大陸，努力工作，希望可以搵返秋兒。秋兒仲有冇同阿柏聯絡我就唔知，但我望住呢七張啼笑皆非嘅咭，覺得自由就係咁諷刺，當我哋千方百計想得到嘅時候，就覺得生活因為無自由而無樂趣；但當我哋垂手可得自由時，偏偏覺得原來有好多嘢係俾佢更重要。
薛可正Facebook Page
http://www.facebook.com/sithoching